"Saliu vret", indulgjenca e vetme e socialistëve

Kanë dalë sot në skenë me pamje triumfatori gjykatësit mediatikë e popullorë të Sali Berishës. Gjykata e Strasburgut ka marrë një vendim për padinë e familjarëve të Aleks Nikës, i vrarë më 21 janar 2011. Dhe loja nisi.

I vrau shteti. I vrau Berisha. Tani çdo gjë rifillon nga e para! Avokati Idajet Beqiri, eci më tej: sipas tij ligji për protestat dhe Gardën është shumë i mirë dhe se ai është shkelur.

Por a është kështu?

Gjykata shprehet se me veprimet e kryera ka patur shkelje të nenit 2 të Konventës së të Drejtave të Njeriut dhe përdorim disproporcion të forcës. Por e njëjta gjykatë çmon se ka gjetur mangësi në legjislacionin në fuqi për sa i përket detyrimeve që rrjedhin nga Konventa. Pra, policia e mandej Garda e Republikës, kanë vepruar me një ligj problematik

Si deklarohet atëherë që fajin në kuptimin juridik e ka Berisha? 

Më paradoksalja dhe cinikja: Gjykata çmon se nuk është bërë një hetim i plotë për ngjarjen dhe me këtë rast triumfatorët deklarojnë se kjo ndryshon çdo gjë. Pra tani do rinisë hetimi! 
Po kush i ndaloi të gjithë këta që të hetonin deri më sot? Ah, po. Drejtësia e korruptuar sigurisht! Mirëpo vetë avokati Beqiraj sot thoshte se provat e reja të 21 janarit, që sjellin urdhëra të regjistruar audio, nuk u konsideruan nga SPAK dhe i kaluan prokurorisë së Tiranës që shpalli moskompetencë. Si do të kryhet atëherë hetimi thelbësor?!

Kjo nuk ka asnjë siguri. Ne po shohim sesi një vendim i Strasburgut po përdoret për qitje politike: pas non grata-s, Berisha mbahet nën presion me këtë çështje. Nuk është hetuar tani, sepse në të vërtetë shumica e z. Rama nuk ka dashur të hetojë. Sepse një hetim i plotë do të kërkonte bisedat e zyrtarëve socialistë në atë ditë, organizimin e kryer nga PS-ja me atë protestë dhe mandej mundet të kemi provat e mjaftueshme për të folur për përpjekje për destabilizim apo përmbysje të rendit kushtetues. Një akuzë kjo jo e vogël.

Ndaj ky hetimi tërësor është lënë mënjanë ai pjesë e pazareve që bën politika shqiptare, ndërkohë që loja politike e tanishme e qyqarëve të medias ka një synim primitiv: hakmarrjen ndaj Malokut dhe ngulitjen e idesë se “Saliu të vret”. Xhanëm vrasja është indulgjenca e fundit që pushteti i z. Rama mund të ketë tashmë. Sa për vjedhjet, qeveria e z. Berisha duket një çerdhe kolopuçësh. Por kush po pyet për vjedhjen? Askush, as gazetarët që kanë disa bordero që vetëm hallin e drejtësisë nuk kanë.

s.zaimi