Berisha merr kaçakçe vendin bosh në KLD

Nuk pati supriza. Fitoi njeri i Berishës, Elvis Cefa. Mirëpo, ndërsa s’pati surpriza në rezultat, pati surpriza në metodë e në procedurë. Fillimisht u ra dakord  që votimi të bëhej i fshehtë, me kuti, por krejt papritur Berisha, me sa duket i përndjekur nga ideja e ‘Juda’-ve brenda maxhorancës, ka urdhëruar votimin elektronik, që e mbylli lojën në pak sekonda, aq sa duhen që secili ‘robot’ i maxhorancës të shtypte butonin e që makina të bënte operacionin e mbledhjes aritmetike. Pak përpara kësaj, deputetët socialistë pretenduan se ish dhënë urdhër që deputetët të nënshkruanin në fletën e votimit, në mënyrë që të kish garanci se nuk do të kish firo rrugës (dhe vendosën ta quanin votim i fshehtë!!!).

Por votimi elektronik i thjeshtoi në maksimum këto kurthe të procedurës së votimit të fshehtë. Berisha mori aq vota sa i duheshin. Nuk dihet se për kë ka votuar Fatmir Mediu (ka pretendime se ka votuar kundër Vishës ‘së vet’), por thuhet se grupi i LSI-së nuk ka votuar.

Të dhëna më të hollësishme do merren vesh në orët në vijim.

Re.Pu.