Kanarinat a kanë faj?! Hë ‘’kurban’’!

Minatori ndërsa gërmon në thellësinë e tunelit, mikun më të mirë ka një kanarinë në kafaz. Bukë të thatë i thërrmon, flet me të, i fishkëllen…I tregon gjithçka, madje edhe ato që nuk do ia thoshte as diellit! I tregon se prej këtyre gurëve të zi bëhet edhe kafazi…kazma, lopata, karroca!

Minatori ia tregon të vërtetat kanarinës, për mafjen, sindikatën, skamjen…për politikën, gjeopolitikën, bursën…

Kanarina i këndon kësaj ironie pa pushim…Katrrithet në tela, përplas krahët, kërkon rrugë- dalje. Nuk gjen e nuk gjen, as për vete, as për minatorin, por dhe në atë errësirë përsëri nuk i pushon goja e përsëri këndon.

Vjen një ditë, ndërsa gërmon minatori, kanarina nuk këndon më. I merret fryma, përpëlitet, përplaset. Para se të japë shpirt, me krahët i tregon rrugëdaljen minatorit.

Ai,vrapon dhe shpëton, pasi kanarina duke dhënë shpirt e paralajmëron për gazin helmues të galerisë dhe minatori rron veçse në sajë të një gjoksi sa thoi i gishtit të madh…Tashmë e ka humbur mikun e tij më të mirë, një humbje që i peshon sa vetë mali që gërryen.

Mirëpo, kur minatori vrapon drejt daljes dhe nuk ia del dot të dalë, kanarina a ka faj?

Po kur 7 minatorët e fundit nuk ia dolën?   

Po kur nuk ia dolën me dhjetëra e qindra minatorë në këto dy dekada ‘’demokraci’’?!

Kanarinat apo gazrat helmuese të pushteteve e patën fajin?

Kur brenda disa ditësh u mbyllën me qindra e mijëra kazino në të gjithë vendin, pse mos të mbylleshin po në të njëjtën kohë edhe minierat e vrasjeve masive? Hë kurban, shprehu, Ministri i minierave apo kanarinat e patën fajin?

Ja të bëjmë sikur nuk ka ndodhur gjë! Ti harrojmë të gjitha këto vrasje shtetërore!

Po John Kerry, që në rininë e tij ka qenë një prej mbrojtësve më të zellshëm të kanarinave; që pikërisht mbi këto kauza e ka ngritur karrierën politike! Sot shndërrohet në urdhëruesin e marrjes së armëve kimike të Sirisë për një popull që prej shekujsh helmohet!... Jo, ja për këtë nuk mund të bëjmë sikur nuk po ndodh gjë.

Tashmë, kanarinat po i këndojnë edhe kësaj ironie!

Sepse me qindra fëmijë sirianë, të mbështjellë në qefina, nuk ia dolën pas shpërthimit të sarinës, madje shumë prej tyre të stërvitur më mirë se sa fëmijët tanë dhe përsëri nuk ia dolën të dalin nga tuneli.

Hë kurban, në atë rast, kanarinat a kishin faj?!

Nëse jo, kanarinat në bulevard që paqësisht kërkojnë shpjegime rreth armëve kimike të Sirisë, a kanë faj?

Sot Kozara, Sazani, Fatosi, Blendi, Muçi, Lavdoshi, Elsa, Sandri, madje krahas shumë të tjerëve edhe djemtë e mi, Mareni dhe Enisi, nuk po bëjnë gjë tjetër, veçse atë që John Kerry ka pas bërë në rininë e tij, madje pa asnjë ambicie për t’u bërë politikanë!

Të ta them troç, hë “kurban”…

Pse 4 dëshmorët e 21 Janarit, a nuk ishin edhe ata kanarina të pafajshme, apo ishin thjesht kurban…?!