Ilir Meta, “Gjino” apo “Plaku Mere”?

Ilir Meta u bë kryeministër i Shqipërisë fill pasi kishte kapur moshën 30 vjeç. Ai zëvendësoi në atë post një 30 vjeçar tjetër, Pandeli Majkon, i cili, për një vit, kishte mbushur në kryeministri boshllëkun e krijuar nga zbythja e përkohshme e Fatos Nanos nga jeta politike. Përdora fjalën “u bë” dhe jo “u zgjodh” për Metën sepse, në fakt, atë e BËRI kryeministër Nanua, i cili, pasi u RIZGJODH kryetar i PS-së me një epërsi të vogël votash ndaj Majkos, përkrahu kandidaturën e 30-vjeçarit tjetër për kryeministër, në mënyrë që mos të shkaktohej një çarje e pariparueshme e partisë.

Por shumë shpejt, “regjenti” Nano u bë pishman për pushtetin që i kishte dhënë “princit” Meta, sepse ky i fundit, duke përdorur atë pushtet, arriti të siguronte përkrahjen e 70% të KPD-së socialiste. Dhe nëpërmjet lëvizjes së famshme “Katarsis”, Nanua e rrëzoi nga froni “princin” Meta, dhe vuri përsëri përkohësisht në të “ish-princin” Majko. Me fjalë të tjera, iku një “Gjino” e rierdhi “Gjinoja” paraardhës… (Emri i personazhit Gjino në komedinë “14 vjeç dhëndër” të Çajupit përdorej në shtypin e kohës si eufemizëm për të rinjtë që iknin e vinin në postin e kryeministrit)

Një skenar të ri me rol “Gjinoje” për Metën parashikonte para 10 ditësh Sokol Balla në revistën JAVA (http://www.respublica.al/artikuj/2012/11/04/nese-ps-dhe-koalicioni-marrin-68-mandate-pd-dhe-koalicioni-68-dhe-pjesen-tjeter-e ). Sipas Ballës, Ilir Meta është i prirur drejt një koalicioni me PD-në sepse:

1. Meta mendon se e bën mirë punën e kryeministrit; ai është i prirur për të qenë numri një. Dhe këtë mund t’ia japë vetëm Berisha, i cili, nëse fiton mandatin e 3-të, mund të mos joshet më nga posti i kryeministrit, pasi do të dojë ta mbyllë karrierën në Presidencë.
2. Rama është në garë për kryeministër, dhe këtë post s’mund t’ia japë Ilir Metës.
3. Meta e sheh Ramën si një vartës të dikurshëm dhe e ka psikologjikisht të pamundur të bëhet nesër vartës i tij.

Në këtë skenar të Ballës, është i trupëzuar presupozimi se Meta është i preokupuar kryesisht për rolin që do të luajë në skenën politike shqiptare në moshën 45 vjeç dhe jo kur të jetë 55 vjeç. Në qoftë se e para është e vërtetë, skenari i Ballës edhe mund të materializohet – Berisha mund t’ia dhurojë Metës rolin e “Gjinos” pas dy vjetësh… (Presidenti Nishani mund të japë dorëheqjen për arsye shëndetsore dhe vendin e tij ta zërë Berisha).

Parë nga ky këndvështrim, qarkullimi i idesë së një koalicioni paraelektoral LSI-PDIU mund të jetë thjesht një blof i Metës ndaj Berishës, për të shtuar trysninë ndaj tij për sigurimin e postit të kryeministrit pas dy vjetësh (Më gjerësisht për këtë blof hipotetik të Metës: http://www.respublica.al/opinion/2012/11/12/bast-apo-blof-i-ilir-metes ).

Por problemi është se “Gjinoja” Gjino mbetet. Një kryeministër që rri në post falë votave të një mazhorance që nuk e kontrollon, nuk mund të ketë jetëgjatësi në të. Siç theksova në fillim të këtyre rreshtave, Majkua dhe vetë Meta e kanë provuar këtë skenar në të shkuarën. “Plaku Mere” i mazhoranës së atëhershme parlamentare i shkarkoi që të dy kur ia deshën llogaritë e veta… (Plaku Mere është ai personazhi i filmit “Njeriu me Top”, i cili kishte një autoritet të padiskutueshëm në familjen e tij)

Por a ka shans Ilir Meta të jetë një ditë në rolin e një “Plaku Mere”? Në skenarin e Ballës, një farë shpresëze hipotetike që Ilir Meta të bëhet udhëheqësi i një mazhorance parlamentare në të ardhmen do të krijohej nga një rikthim i tij eventual tek partia mëmë. Por problemi është se kete mund ta beje vetëm pasi t’i ketë shërbyer Berishës si mëkëmbës në qeveri për disa vite. Dhe atëherë mund të jetë shumë, shumë vonë për të. Kjo sepse, së pari, në qoftë se Meta e ndihmon Berishën të marrë një mandat të tretë në 2013-ën, Partia Socialiste mund të ndahet në disa copa. Ose, më keq akoma për Metën, ajo mund të mos e pranojë atë as si anëtar të thjeshtë, pas ndihmës së florinjtë dhënë Berishës…

Një skenar i ndryshëm nga i Ballës është:

1. Futje më vete në zgjedhje e koalicionit LSI-PDIU;
2. Bashkim i votave me PS-në në Kuvend pas zgjedhjeve, për krijimin e qeverisë (Rama dhe elektorati i tij do të gëlltisnin çdo mëkat të shkuar të Metës, vetëm për të rrëzuar “gogolin” Berisha);
3. Në një periudhë disa-vjeçare, shkrirje graduale e LSI-së me PS-në.

Në këtë skenar, dikur-dikur, kur Edi Rama të tërhiqet ose të dalë nga skena politike, Meta mund të shpresojë të bëhet “Plaku Mere” i mazhorancës së majtë. Kuptohet, në qoftë se ai e synon këtë rol.  Sepse Meta mund të jetë i kënaqur thjesht edhe me rolin e “Gjinos”…