Vizitat ‘shtetërore’ të blera me paratë tona

Në një shkrim të Bledar Hotit në Shqip, flitet mbi shpenzimet që janë bërë nga qeveria shqiptare për të “rregulluar imazhin e Shqipërisë”, të cilat praktikisht kanë synuar “protagonizmin e imazhin e kryeministrit”. Në shkrim flitet për mënyrën se si u sigurua pjesëmarrja e Berishës në mbylljen e sesionit ditor të NASDAQ-ut, ku ai “shtypi butonin e ziles që sinjalizon mbylljen e sesionit ditor të NASDAQ-ut dhe mori trofeun që simbolikisht u jepet personaliteteve botërore që bëjnë mbylljen ditore të bursës”. Këtë sukses të Berishës e ka bërë të mundur firma e njohur Podesta Group, në këmbim të më shumë se 360 mijë dollarëve amerikanë.

Pagesa e pare (gazeta “Shqip” disponon dokumenta që e vërtetojnë këtë fakt) është bërë më datën 11 mars të vitit 2011. Shuma e derdhur që figuron është 180 mijë USD. Ndërsa pagesën e dytë, qeveria shqiptare e ka kryer më 26 shtator, pikërisht pesë ditë pasi Kryeministri mbylli zyrtarisht bursën e NASDAQ-ut, në SHBA. Kësti i dytë i pagesës së kryer është po 180 mijë dollarë amerikanë. Po përveç këtyre tarifave, mësohet se qeveria shqiptare ka kryer dhe pagesa shtesë po në këto dy data, pra më 11 mars dhe në 26 shtator, të titulluar në zërin e rimbursimeve, përkatësisht me 5,813.46 USD dhe 6,919;64 USD. Këto shpenzime prej rreth 13 mijë USD janë veçmas dhe përbëjnë pagesën e Podesta-s për punën e kryer prej saj.

Re.Pu.