Suksesi i sjell ‘problemet e para’ Igli Tares

Nuk ka diskutim se Igli Tare ka qenë i sukseshëm si drejtor sportiv i klubit të Futbollit ‘Lazio’. Nuk mbahej mend qyshkur Lazio nuk po arrinte të ndodhej në katin e sipërm të tabelës së klasifikimit, dhe ja, kjo Lazio që mund të quhet në një masë të madhe e Igli Tares, ndodhet në vendin e katërt, vetëm katër pikë larg vendit të dytë. Dhe pikërisht në kulmin e suksesit Igli është ‘viktimë’ e pritmërive që ka mbjellë (jo i vetëm, të kuptohemi; Presidenti Lotito duket se s’ia ka prishur për asgjë) tek spektatorët e tek lojtarët. Shtypi italian ka folur me këmbëngulje për një sherr mes tij e sulmuesit Miroslav Klose, i cili po kalon një periudhë të një forme të shkëlqyer. Ky i fundit, thotë shtypi, ka patur një moment rebelimi, pasi ka pritur një fushatë më agresive blerjesh, të cilat do ta ndihmonin Lazio-n të ish më kompetitive (Klose, si të gjithë lojtarët e mirë, është mësuar të jetë pjesë e një skuadre që pretendon trofe e që synon pjesëmarrjen në Champions League). Dhe e ka drejtuar gishtin nga Igli Tare. Madje, për shkak të fjalëve të rënda që kanë shkëmbyer, gjithnjë sipas shtypit, Klose ka refuzuar të luajë në ndeshjen e fundit me Milanin, e cila u fitua nga Lazio, megjithatë.

“S’është e vërtetë”, thuhet në një deklaratë të klubit për shtypin. “Nuk ka pasur asnjë problem midis Tares e Klose-s; madje ky i fundit është i mendimit se Lazio, kështu si është, mbetet kompetitive”. Në fakt, këtë e thotë dhe agjenti i Klose-s: “Janë të gjitha sajesa të shtypit. Klose nuk luajti kundër Milanit, ngaqë kish dhembje në kofshë”.

Janë deklarata që s’të bindin, megjithatë. Duket se diçka ka pasur. Ashtu siç duket se klubi ka mundur ta mbyllë këtë sherr.

Re.Pu.