Sikur Sashenka ta njihte të drejtën e ankimit për pavlefshmëri

Dje në gazetën “Panorama” ishte botuar artikulli më i gjatë (rreth 1500 fjalë) dhe më i stërholluar deri më sot në mbrojtje të tezës se raporti i ODIHR-it nuk i jepte të drejtë opozitës për akuzën e vjedhjes së zgjedhjeve në Tiranë. E kishte shkruajtur Artan Hoxha (është fjala për komentatorin që qarkullon nëpër studiot e TV-ve në mbrojtje të mazhorancës, jo për gazetarin e ‘News 24” që provoi me video se të paktën një protestues paqësor i 21 janarit u vra nga plumbat e Gardës së Republikës). Në një nga paragrafët e shumtë të artikullit, të cilët Hoxha ka zakon t’i numërizojë, ai shkruan: “Lidhur me vendimin e tretë të Kolegjit, raporti shprehet se ‘kundërshton vendimit e vetë Kolegjit për anulimin e Vendimit 711 të KQZ-së’, pa sqaruar as kundërshtinë dhe as pasojat e saj. Le ta pranojmë se raporti vlerëson se anulimi i Vendimit 711 rikthen të drejtën e ankimit për pavlefshmëri”.

Në momentin që thuhet se PS-ja e kishte në 5 korrik të drejtën e ankimit për pavlefshmëri, i bie që Kolegjit të Sashenkës do t’i duhej të justifikonte vjedhjen e hapur që demostruan në gjyq avokatët e PS-së, kur dhanë dy shembuj mospërputhjesh. Në njërin prej tyre, proces verbali i qendrës së votimit tregonte se ishin përdorur 612 fletë votimi për kryebashkiak; proces verbali i numërimit vërtetonte se u gjetën 612 fletë votimi për kryebashkiak në kutinë e asaj qendre (pra, asnjë s’mungonte); pamjet filmike të numërimit e riverifikonin këtë gjë; ndërsa KQZ-ja e Ristanit kishte “gjetur” edhe 4 fletë votimi të tjera për kryebashkiak në kutitë për minibashkinë, ndërkohë që në kutinë e kryebashkiakut ato nuk mungonin…
E.Z.