Shpërthim militant i Florion Mimës

Florion Mima, ish-ministër i financave, ka dhënë një intervistë për Gazetën Shqiptare. Ka një lloj vetëdorëzimi e nënshtrimi në shumë afermacione të tij, dhe është disi befasuese për të gjithë ata që kanë parë tek Mima një njeri të opinioneve racionale e të balancuara. Në një moment thotë, se “[disa kolegë të mij kanë propozuar emrin e Sali Berishës për President, por kjo ka ardhur] nga egzaltimi që ne ndjejmë kur bëhet fjalë për kryetarin e partisë sonë”. Thotë fiks kështu: nga egzaltimi që ne ndjejmë kur bëhet fjalë për kryetarin e partisë sonë. Asnjë militant i PD-së nuk ka arritur ta përshkruajë publikisht raportin e vet me Berishën në terma të një përunjësie të tillë të skajshme. Për ata që nuk e dinë, ‘egzaltimi’ është ndjesia e një gëzimi drithërues e të pamatshëm (anglisht: exultation).

Por në këtë intervistë ka dhe ndonjë moment tjetër disi të turbullt. Kur i duhet të japë një gjykim mbi koalicionin PD-LSI, ai lëshohet krejt papritur me një frazë patetike: “Besoj patundshmërisht se koalicioni aktual ka bërë tok forcën, kurajon dhe energjinë e nëj force të djathtë me dhembshurinë sociale të një force të majtë, dhe këtu qëndron forca e vërtetë e këtij koalicioni”. Ta besojë vetë, vallë, këtë që thotë?

E.G.