Rama flet si mik i “miqve të Shqipërisë”; dhe siguron se autorët e 21 janarit do gjykohen

Edi Rama foli në sallën e Akademisë Arteve dhe la të kuptohej se “miqtë e popullit shqiptar” janë duke bërë çmos për ta zbardhur të vërtetën e 21 janarit 2011. Dhe me “miqtë e Shqipërisë” kish parasysh mbi të gjitha SHBA-të, të cilëve iu kthye tri herë në fjalën e vet. “Drejtësinë e kërkon Shqipëria, por e kërkojnë edhe miqtë tanë ndërkombëtarë, me në krye SHBA-atë, që kanë angazhuar agjencinë më të madhe të botës, FBI-në, për të zbardhur 21 janarin. Pa mbështetjen e SHBA-së, Shqipëria nuk do të shihte asnjë hetim për 21 janarin.”, tha ai fillimisht.

Pak më poshtë, në tentativë për të shpjeguar optimizmin e vet, se krimi i 21 janarit do të hetohet e gjykohet, u kthehet prapë miqve: “Jam i bindur se 21 janarin e ardhshëm, drejtësia do të vihet, sepse provat e FBI-së do të hedhin dritën që nuk mund të shuhet në asnjë mënyrë nga drejtësia e korruptuar. Prandaj, shpreh një mirënjohje të thellë ndaj SHBA-së dhe ndaj ambasadorit Aleksandër Arvizu.” Dhe kjo ishte hera e dytë.

Në fund bën një lidhje mes shpresës së familjarëve për drejtësi dhe prononcimit më të fundit të ambasadorit Arvizu në Top Story: “Lajmi i ambasadorit amerikan për hetimet e FBI-së, u ka dhënë shpresë atyre se drejtësia do të vihet në vend, u ka dhënë mbrapsht shpresën e rifillimit të jetës së tyre, pas vënies së drejtësisë për Faikun.” Dhe kjo ishte e treta.

Dy ishin mesazhet që Rama ka dashur të përcjellë: 1. Diplomacia perëndimore, dhe ajo amerikane, janë me opozitën tanimë, dhe 2. Drejtësia do ta zbardhë se s’bën krimin e krye një vit më parë.

Re.Pu.