PD-ja nxjerr Trashanin; Edi Rama merret vetë me të

Sot nuk kanë dalë zëdhënëset e zakonshme të PD-së e të qeverisë, Mustafaraj e Mëhilli. Në vend të tyre është shfaqur në një konferencë për shtypin deputetja Arenca Trashani. “Të gjithë politikanët kanë përgjegjësi për respektimin e shtetit ligjor dhe respektimin e vendimeve të gjykatave. Ata duhet të japin shembullin e tyre në marrëdhënien me gjyqësorin, qytetarët e meritojnë një gjë të tillë dhe bashkësia ndërkombëtare pret pikërisht këtë”, tha deputetja e PD-së.

Dhe pak më poshtë i ikën stilit disi impersonal, dhe flet drejtëpërdrejtë për Ramën: “Halli i zotit Rama nuk është dënimi i atyre deputetëve, që nga përfaqësues i ka kthyer zyrtarisht në shpifës përsëritës, por frika e rrëzimit të shpifjeve”.

Rama ka vendosur t’u përgjigjet vetë të gjithëve e të gjithave. Ka kohë që nuk nxjerr zëdhënës e përfaqësues të vetët, apo të partisë. Dhe reagimi është piktoresk e disi përbuzës: “Zonja Trashani fort trashë i bie kur mbron vendimet e trasha të gjykatësve që trashanikisht dënojnë opozitën. Po zonjës Trashani ia vënë në gojë këto trashësi që trashen përditë si zullumi që po këputet e ajo i reciton nëpër gjumë!”.

E.G.