Paga variabile për mjekët dhe infermierët, por spitaleve u mungojnë ilaçet

Struktura e pagave të infermierëve dhe mjekëve në spitalet e vendit pritet të ndryshojë. ISKSH vjen me një propozim të ri në lidhje me funksionimin e spitaleve. Shtypi sot i referohet një deklarate të bërë dje nga drejtoresha Elvana Hana, e cila thekson se: “Duhet të kalohet nga mënyra e pagesës me buxhet fiks historik, në pagesë për performancë, që do të thotë pagesë për numrin e pacientëve, ditë-qëndrimin në spital dhe cilësinë e shërbimit që ofrohet”. Ajo citohet gjithashtu të ketë thënë: Është vënë re se shfrytëzimi i shtratit, është në nivel të ulët. Kështu, metoda e financimit aktual nuk i stimulon spitalet që të jenë të interesuara në ofrimin e shërbimeve efecentë dhe produktive, prandaj ka ardhur koha që ajo të ndryshojë”.

E përkthyer ndryshe, nisma që pritet të ndërmarrë ISKSH-ja, parashikon që pagesat e mjekëve dhe infermierëve të jenë të ndryshueshme dhe jo fikse siç janë tani. Do të paguhen më shumë ata që kanë një numër të madh të shtruarish dhe më pak ata “që nuk kanë punë fare”.

Ky është një ndryshim thelbësor në shërbimin shëndetësor të vendit, megjithatë më shumë se “me hallin” se si do të paguhet stafi, spitalet po përballen me mungesa të theksuara ilaçesh apo pajisjesh të tjera, të cilat nuk mundësojnë shërbimin e nevojshëm ndaj pacientëve. Këta të fundit detyrohen herë pas herë që të shkojnë t’i blejnë me paratë e tyre edhe medikamente nga më bazikët, siç janë serumet ose më keq akoma, aget, shiringat, pambukun, etj. Të gjitha këto mungesa vijnë për shkak të keq administrimit dhe metodave korruptive drejtuese, siç pasqyrohet në raportin më të fundit të KLSH-së pas një kontrolli të ushtruar në Qendrën Spitalore Universitare “Nenë Tereza” në Tiranë. 

S.E.