N/kryetari i Këshillit bashkiak, një votë e majtë shkon djathtas

Zamir Ndroqi, i propozuar nga Aleanca për Qytetarin, ka fituar si nën kryetar i Këshillit Bashkiak të Tiranës edhe me një votë të majtë. Ndroqi ka marrë 29 vota kundrejt 26 votave të kandidates së majtë, Adriana Berberit. Me një përllogaritje të thjeshte, Ndroqi ka marrë një votë nga këshilltarët e majtë duke ditur se raporti i forcave mes të djathtës e së majtës në Këshillin Bashkiak të Tiranës është 28 me 27. Duhet theksuar se “tradhëtari” është i pamundur të identifikohet duke qenë se votimi ishte i fshehtë. Të djathtët kanë marrë edhe postin e kryetarit të Këshillit Bashkiak i cili i ka shkuar Njazi Kosovrastit pas përballjes me kandidaten e majtë Mimoza Hafizi. Kampet nuk kanë lëvizur jashtë vijave politike në këtë rast: Kosovrasti ka marrë 28 vota, ndërsa Hafizi 27. Këshilli Bashkiak më pas i ka dorëzuar mandatin Lulzim Bashës i cili do të qeverisë kryeqytetin në katër vitet e ardhshme. Pas betimit, Basha në fjalën e rastit ka thënë se do ta mbajë Tiranën larg konflikteve politike dhe se do t’i qeverisë njësoj, si ata që votuan pro tij, por edhe ata që votuan kundër apo abstenuan. Të pranishëm në mbledhjen e Këshillit Bashkiak ishin ambasadori i OSBE-së Wolfarth, Zv/ambasadorja e SHBA Debora Johnes, si dhe ambasadorja e Polonisë, Irena Tatarzinska.