Gazeta Shqiptare si Ferdinand Xhaferri: Mustafa Kruja në dy lista

Kthimi i eshtrave të shqiptarëve të shquar, pavarësisht qëndrimit të tyre politiko-ideologjik, është gjithmonë një temë me spec. Kjo sepse një ministër shqiptar, Ferdinand Xhaferri, pat shpallur në ngut e sipër se do të kthente në atdhe eshtrat e Ismail Qemalit të cilat ishin sjellë nga Italia e varrosur në Shqipëri në vitin 1932. Një nismë e qeverisë shqiptare për kthimin në atdhe të mbetjeve mortore të një liste të gjatë shqiptarësh të shquar ka gjetur vend sot në faqet e ‘Gazetës Shqiptare’. Por ashtu si ministri Xhaferri, edhe gazetarja provon se burrat e mëdhenj të së shkuarës janë deri diku të harruar e kësisoj edhe i shtyjnë në gabime njerëzit e kohës sonë. Kështu, emri i Mustafa Krujës kryeministrit shqiptar gjatë pushtimit fashist, gjendet në të dy listat e hartuara nga ‘Gazeta’: në atë të personaliteteve eshtrat e të cilëve janë kthyer dhe në atë eshtrat e të cilëve nuk janë kthyer. Qeveria shqiptare, me sa duket për t’ia shtuar pompozitetin 100 vjetorit të Pavarësisë ka hartuar një listë të shqiptarëve të shquar që prehen në ‘dhera të huaja’ dhe do nisë nga lobimi për rikthimin e eshtrave të tyre në atdhe. Në këtë listë janë: Mbreti Zog, Nënë Tereza, Fan Noli, Abaz Kupi, Mit’hat Frashëri, Aleksandër Moisiu, Ernest Koliqi, Ali Këlcyra, Rexhep Mitrovica etj. Do të ishte mirë që në këtë listë të qeverisë të mos kishte ndërkohë ‘varre të riatdhesuara’.

 H.B.