"Fidel Castro vdes". Vrasësi është… Twitter!

“Fidel Castro ka vdekur!” Lajmi fluturoi nga Kuba përmes Twitterit dhe bëri xhiron e botës, duke u cituar nga shumë e shumë burime lajmesh, për t’u marrë vesh më vonë që ishte i rremë. Një natë të tërë lajmi për ikjen e Liderit Maximo, i përgënjeshtruar më vonë, u ripërcoll në Twitter pa pushim.

Ndër të tjera, në mesazhet Twitter thuhej edhe se “Cuba Press ka verifikuar vdekjen e Fidel Castros. Sonte do të bëhet shpallja e lajmit nga qeveria kubane.” Por ky lajm nuk u konfirmua nga asnjë burim i besuar nga brenda Kubës. Përkundrazi, një burim i besuar, ka shkruar në blogun e vet se “Kastro e studioi, e analizoi dhe pataj qeshi me të madhe me lajmin e vdekjes së tij në Twitter”.

Kjo nuk është hera e parë që Twitter tenton ta vrasë Kastron, siç ishte ajo e gushtit të kaluar kur në këtë rrjet social nisi të qarkullonte një foto e Fidelit të vdekur. Edhe në shtator ishin përhapur lajme të tilla për vdekjen e Fidelit, më pas të përgënjeshtruara në mënyrë zyrtare.

Në dhjetor, Kastro hyri në Librin e Rekordeve Guinness si personi me më shumë tentativa për ta vrarë, 638.

Fideli nuk është i vetmi diktator që populli i vet do të donte ta shihte të vdekur, duke ia ndjellur më se një herë vdekjen. Por, me sa duket Zoti nuk përdor Twitter për të bërë sondazhe.

n.s.