Britania goditet nga krimi “për çështje nderi”; si Shqipëria

“E vrau për çështje nderi”. Kjo frazë kanunore nuk përbën lajm e as habi për ne shqiptarët, pasi krime të tilla këtu ndodhin përditë, kryesisht ndaj grave. Mjafton të kthehemi vetëm pak muaj më parë, kur në Korçë një 70-vjeçar vrau dhe më pas e coptoi trupin e gruas me të cilën bashkëjetonte, po për çështje nderi. Po gjatë vitit 2011, në Velipojë babai vrau në gjumë të birin 17 vjeç, për arsye se ai vidhte dhe i merrte nderin përpara njerëzve. Një rast i veçantë është ai i vitit 2003, kur një baba vrau të bijën sepse kishte dalë pa lejen e tij në shëtitje me të dashurin e vet. Për këtë krim, gjykata dha një dënim me vetëm 16 muaj burgim. Në të njëjtin vit dhe për të njëjtin krim, një gjykatë në Londër dënoi një prind me burgim të përjetshëm. Është gjë e rrallë atyre anëve? Nuk duket kështu.

Në Britaninë e Madhe, krimet për çështje nderi janë rritur 47 % më shumë se një vit më parë. Sipas një artikulli të gazetës britanike The Guardian, numri i vajzave dhe grave të dhunuara nga familja apo komuniteti i tyre në Mbretërinë e Bashkuar po rritet frikshëm. Statistikat e mbledhura nga policia britanike në 12 zona, tregojnë se rastet e krimeve për çështje nderi janë rritur në 47 % më shumë brenda një viti. Pra 3 mijë raste më shumë se viti që kaloi. Llojet e abuzimeve që janë hasur kanë qenë: kërcënime, rrëmbime, djegie e fytyrës me acid, rrahje, martesë e detyruar, gjymtime dhe vrasje. Të dhënat e shfaqura në gazetën The Guardian nga Organizata e te Drejtave të Grave Iraniane dhe Kurde, nuk janë të plota, pasi në katër zona të Skocizë nuk ka përfunduar akoma mbledhja e tyre.

Rastet janë të shumta, por vlen të përmendet një rast i ndodhur 5 vjet më parë në Angli, i ngjashëm me atë të vitit 2003 në vendin tonë. Në vitin 2006, një 20-vjeçare kurde u mbyt me urdhër të babait dhe xhaxhait të saj, për shkak se ajo nuk i ishte bindur urdhërit për të mos u takuar me të dashurin e saj.

M. Lela