Blushi kundër Berishës: Çështja e monarkisë është e mbyllur

Intervistën me politikanin dhe shkrimtarin Ben Blushi në misionin Top Story, Sokol Balla e ka nisur me atë që gjatë këtyre dy ditëve është kthyer në ‘çështje dite’: vdekjen e Leka Zogut. Blushi ka kundërshtuar Kryeministrin dhe deklaratën e tij se çështja e monarkisë dhe referendumit për të është e hapur. “Çështja e monarkisë është e mbyllur”, ka thënë Blushi në Top Story duke argumentuar se respekti për pretendentin e vdekur të fronit mund të jetë historik e qytetar, por jo si monark. Ai ka pranuar se Zogu rrjedh nga një familje e madhe shiptare e lidhur me momente kyç të historisë së Shqipërisë. Deputeti socialist ka shprehur habi se si Kryeministri i një sistemi republican të qeverisjes mbështet dhe lë të hapur mundësinë e një referendumi për formën e qeverisjes së vendit. Sipas tij në Shqipëri, ashtu si në krejt Europën, forma e qeverisjes është e mbyllur dhe nuk mund të ketë kthim mbrapa te monarkitë. Blushi është socialisti i tretë që shprehet në lidhje me vdekjen e Leka Zogut pas Pandeli Majkos që ka folur me tone pozitive dhe Erjon Braçes që ka bërë të kundërtën.

H.B.