Bilal Kola versus Fatbardh Kadilli

Para tri ditësh, deputeti i PD-së, Fatbardh Kadilli, kish një shkrim të vetin në Panorama me titull ‘Borxhi ndaj të përndjekurve dhe e majta’. Në këtë shkrim, Kadilli shfaqej i shqetësuar nga një përpjekjte e PS-së për t’u afruar me ish të përndjekurit, ndërkohë që socialistët janë, sipas Kadillit të asistuar nga muzat, “dhunues që, në emër të një ideali mashtrues, ende duan të mashtrojnë ata që dikur i dhunuan, persekutorë që, nga etja për sundim, ende duan të sundojnë ata që dikur i persekutuan”. Por Kadilli nuk e ka vetëm me PS-në. E ka dhe me “një numër të vogël individësh [të përndjekur] të keqpërdorur apo të keqformuar mes viktimave të dhunës së djeshme, një pjesë e të cilëve njihen botërisht si mbështetës apo aktivistë të PS-së”.

Sot, po në Panorama, është një përgjigje e Bilal Kolës. “Përgjigje një fletrrufeje”, e kish titulluar Kola shkrimin e vet, të cilin e fillonte, për të krijuar kontrastin me Kadillin, duke thënë se kush është ai personalisht: “Jam lindur dhe rritur në internim deri 18 vjeç, im gjysh, vëllezërit e tij dhe xhaxhallarët e mi janë pushkatuar pa gjyq pasi strehonin në shtëpi misionet ushtarake britanike, pjesa tjetër e familjes është internuar nga 1945–1991, im atë është “katapultuar” për herë të dytë në burgun famëkeq të Burrelit kur unë isha vetëm 2 vjeç etj.” Bila Kola është i biri i Kurt Kolës. Duket se është i zemëruar me etiketën “të keqpërdorur apo të keqformuar”, që Kadilli i ka ngjitur, dhe në fund s’e ka për gjë të tregojë se nuk e ka kompleks bashkëpunimin me PS-në. “Sa për insinuatat bajate se lideri i opozitës bën pjesë tek ata që kryen krimet ndaj ish-të përndjekurve dhe ‘kryedemokrati’ është ‘shpëtimtari’ i kësaj shtrese, këtë butaforizëm nuk ka patericë propagandistike ta mbajë në këmbë, por saktësisht të kundërtën po e shohin dhe e prekin tash e 21 vjet të përndjekurit qëkur njëri prej tyre që në ditët e para të pluralizmit, në përputhje me bindjet e tij liberale, kërkonte lirimin e të burgosurve politikë dhe tjetri, po në përputhje me bindjet dhe statusin e tij prej më shumë se dy dekadash si komunist e sekretar partie, atëherë me fjalë dhe sot e gjithë ditën me vepra na etiketon si ‘llumi i shoqërisë’.”, shkruan ai.

E.G.