Arvizu: 1. Në Shqipëri ka krizë ekonomike; 2. Për celulat anti-amerikane jam interpretuar gabim

Ambasadori amerikan duhet ta ketë merak t’i begenisë të gjitha mediat e Tiranës, pasi një çbalancim i lehtë në hartën e tij të vizitave televizive do të interpretohej si qëndrim politik. Ja, sot në mëngjes ka qenë në Vizion Plus, në programin ZIP. Dhe aty ka treguar se bën pjesë tek klubi i skeptikëve lidhur me marrëveshjen mes PS-së e PD-së. E ka përshëndetur dhe mirëpritur këtë marrëveshje, por përvoja e këtushme diplomatike, e shkurtër dhe e mbushur me ngjarje, i ka futur në kokë bindjen se qëndrimi më realist ndaj çdo zhvillimi të Tiranës është ai dyshues e skeptik. “Jam i kënaqur që shikoj se ka një fare dakordësie mes palëve për të ecur përpara me axhendën e reformave, por ende ka shumë mosbesim mes palëve”, tha saktësisht ai.

Për herë të parë, ai u ndal edhe në situatën ekonomike të vendit, duke folur për diskutimin e projekt-buxhetit, për transparencën e shpenzimeve, e deri dhe për kreditë me probleme (ka me sa duket dhe një vetëdijë ndërkombëtare mbi Shqipërinë në krizë), por pjesa më kureshtare e bisedës ishte në fund, kur ambasadorit u pyet, nëse i qëndronte ende sendërgjisë së celulave amerikane (termi “sendërgji” është i yni. Re.Pu.).  Dhe Arvizuja bën një si tërheqje: “Kam thënë disa gjëra dhe mendoj se ka patur disa deformime të atyre që janë thënë.... I kuptoj tërësisht kritikat ndaj qeverisë së SHBA-ve, ndaj meje personalisht, por më vjen keq kur disa njerëz e përdorin këtë për përfitime të ngushta politike”. 

Re.Pu.