Alibeaj versus Spahiu, ose vulgarizimi total i politikës

Deputeti Enkelejd Alibeaj ka dhënë një intervistë për Shqipin, dhe në të merret me ish-kryetarin e KLD-së, i cili ka shpallur nga Amerika se Aleanca Kuqezi do të marrë pjesë në garën elektorale të radhës. Alibeaj, që është dhe kryetari i një komisioni parlamentar për të hetuar aktivitetin e Spahiut si zv.kryetar i KLD-së, synon ta minimizojë rolin dhe avenirin e Spahiut në politikë, dhe nuk i shkon mendja se, ai dhe të tjerët si ai, duke u marrë gjatë me të nuk bëjnë gjë tjetër, veçse e faktorizojnë. Sidomos kur nuk gjejnë gjë tjetër për të thënë, veç broçkullave. Ja, si Alibeaj në këtë intervistë.

Teksa gazetari kërkon të krijojë një kontrast mes asaj që maxhoranca thotë për Spahiun, dhe vizitës së këtij të fundit në SHBA, Alibeaj gjen si përgjigje frazat, se “nuk merr përsipër të komentojë vërdallosjet donkishoteske të qytetarit Spahiu”, dhe se “karta e nacionalizmit [nuk mund të nëpërkëmbet] për qëllime të ulëta politiko-karrieriste [nga] një patetik delirant”.

Dhe në fund, ai thotë një gjë aq banale sa të lë pa gojë: “Një legjendë urbane thotë se Kreshnik Spahiu nuk është shqiptar, porse një përfaqësues i një etnie të huaj të ngulur në rrethinat shqiptare të Prizrenit”. Dhe e bukura është se kjo frazë është bash në nivelin e ligjërimit publik të Kreshnik Spahiut, i cili ka zgjedhur për kauzë nacionalizmin më vulgar që është vënë re këtyre anëve.

M.N.