Adriano Celentano në Sanremo: Standing Ovation për këngët, fishkëllima për monologjet

U mbyll festivali i Sanremos, e tok me të edhe tollovia që rrethoi praninë e Adriano Celentanos si i ftuar special. Ky i fundit, sipas kontratës me RAI-n, mund të ngjitej në skenë në të pesë netët, por mbas bujës së provokuar pas natës së parë (shih linkun: http://www.respublica.al/artikuj/2012/2/16/celentano-beri-ne-sanremo-cfare-pritej-te-bente-provokoi-dhe-ndolli-vemendje), zgjodhi të merrte pjesë vetëm në natën e fundit, dmth dje. Këtë herë kish vendosur të mos e tirrte gjatë me monologjet e veta, por “e gjeti kur s’e pandehte”; gjatë të vetmit monolog mbi besimin e mbi raportin me Zotin, ai u ndërpre nga do fishkëllima e zëra që vinin nga platea: “Mjaft më! Je thjesht një predikues!” Nuk i kish ndodhur ndonjëherë që të fishkëllehej, por nuk e humbi toruan. E mbylli monologun më shpejt se sa duhej, dhe iu rikthye këngëve të veta, për të përfunduar me një duet me Gianni Morandin, gjatë e pas të cilit salla u pa e gjitha në këmbë. Italianët, me sa duket, Celentanon e pranojnë në çdo formë, por e duan veç si këngëtar.

Sipas Morandit, që u emocionua deri në ngashërim gjatë duetit me Celentanon, ato fishkëllima ishin të pilotuara. Ndërsa audienca, që nuk mund të pilotohet, ish në maksimum gjatë kohës kur në ekran ish il Molleggiato.

Re.Pu.