Sekuestrohen 500 gram kokainë dhe 110 kg kanabis, 5 në pranga

Në orët e para të ditës së sotme Seksioni Kundër Narkotikëve finalizoi operacionin policor të koduar “Stacioni”, i cili kishte si objekt neutralizimin e një bande që kryente grumbullimin dhe tregtimin e lëndëve narkotike në rrethe të ndryshme të vendit.

Policia Durrësit gjatë këtij operacioni ka arrestuar në flagrancë 5 persona për trafik të lëndëvë narkotike dhe gjithashtu ka sekuestruar gjysmë kg kokainë dhe 110 kg kanabis sativa e ndarë në tetë thasë të ndryshëm. Gjithashtu nga Policia është shpallur në kërkim një person tjetër, i përfshirë në të njëjtin trafik.

Shtetasit e arrestuar janë Bardhok Përndoi, 40 vjeç, banues në Laç, Gjon Shponi, 31 vjeç, banues në Gur i Zi Shkodë, Bledi Shyti (Zefi), 31 vjec, banues në Vau i Dejës Shkodër, Arjan Boka, 55 vjec, banues në Krujë, Isuf Rama, 57 vjec, banues në Fushë Krujë ndërsa shtetasi në kërkim është Alfred Balloku, 33 vjec, banues në Kurbin.