Mbyllen hetimet për ish-dekanin Hysa, Prokuroria: Shkelje jo penale.

Njësia hetimore Task-Forcë pranë Prokurorisë së Tiranës ka vendosur të mbyllë hetimet për ish-dekanin e Fakultetit të Mjekësisë Bajram Hysa, i kallëzuar nga rektori i këtij universiteti për akuzën e “Shpërdorimit të detyrës”.

Vendimi është marrë pak ditë më parë nga prokuroria, për shkak se shkeljet e konstatuara në kallëzimin e rektorit Ali Refatllari, janë të karakterit administrativ dhe jo penal. Për pasojë, prokuroria ka vendosur të pushojë hetimet.

Bajram Hysa është kallëzuar në korrik 2014 për abuzime me financat e fakultetit, ku sipas një auditi nga abuzimi është shkaktuar një dëm financiar prej 553 milionë lekë të vjetra.

Kjo shumë financiar është dhënë në formën e shpërblimeve, rrogave të 13 dhe honorareve për pedagogët që kanë dhënë mësim pranë fakultetit të Mjekësisë në Tiranë. Pas verifikimeve të kryera, prokuroria konsotatoi se këto shkelje nuk kanë karakter penal.