Clinton: Kosova nuk mund të mbetet e izoluar

Kryeministri i vendit, Hashim Thaçi, është takuar në Bruksel me sekretaren amerikane të Shtetit, Hillary Clinton. Me këtë rast, kryeministri Thaçi ka marrë mbështetjen e palëkundur të sekretares amerikane për Kosovën në të gjitha sferat, transmeton njoftimin Telegrafi. 

Në takimin ndërmjet Thaçit dhe sekretares amerikane, Clinton, që thuhet se ishte i paplanifikuar më parë në kuadër të vizitës së kryeministrit Thaçi në Bruksel, është diskutuar për marrëdhëniet e shkëlqyeshme ndërmjet Kosovës dhe SHBA-së.

Clinton, sipas kryeministrit Thaçi, ka përshëndetur marrëveshjet e arritura ndërmjet Kosovës dhe Serbisë, ndërsa ka kërkuar që ato të zbatohen në mënyrë që të dëshmohet konstruktivitet. 

Në këtë takim është diskutuar edhe për perspektivën evropiane të Kosovës, ndërsa edhe në këtë fushë sekretarja amerikane e Shtetit ka ofruar mbështetje, duke e bërë të qartë se Kosova nuk mund të mbetet e izoluar.

Më tej, Clinton ka kërkuar edhe nga qeveria të vazhdojë reformat në gjyqësi dhe në sektorë tjerë të rëndësishëm, të ketë stabilitet politik etj.

koha.net