"Ismail Haniyeh e vramë ne"

Izraeli e ka informuar SHBA-në për përgjegjësinë e sulmit që vrau liderin politik të Hamasit. Pavarësisht se pas ekzekutimit të Ismail Haniyeh në Teheran, Izraeli as nuk e ka konfirmuar dhe as mohuar përgjegjësinë për sulmin, Irani ka thënë se do të hakmerret.

Por sipas Washington Post, qeveria në Tel Aviv e ka vënë në dijeni SHBA-në menjëherë pas vdekjes së Haniyeh.

Ndërsa Izraeli ka refuzuar të komentojë vrasjen e Haniyeh, ai informoi zyrtarët amerikanë menjëherë më pas se ishte përgjegjës.

Zyrtarët e Shtëpisë së Bardhë "u përgjigjën me habi dhe zemërim" kur mësuan për vrasjen e kreut të Hamasit, thanë të martën për Washington Post njerëz të afërt me administratën e presidentit amerikan Joe Biden.

Zyrtarët e Shtëpisë së Bardhë iu përgjigjën me befasi dhe zemërim vrasjes së Haniyeh më 31 korrik, të cilën ata e panë si një pengesë në përpjekjen e tyre disamujore për të siguruar një armëpushim në Gaza.

Sipas burimeve, Uashingtoni beson se masa e autoriteteve izraelite është një "hap mbrapa" në përpjekjet e udhëhequra nga SHBA për të arritur një armëpushim në Gaza, ku luftimet vazhdojnë që nga sulmi i 7 tetorit nga Hamasi mbi Izraelin.

Pas eliminimit të Haniyeh, sekretari amerikan i Shtetit, Antony Blinken, këmbënguli se Uashingtoni "nuk ishte në dijeni apo i përfshirë" në atentat, pavarësisht se Izraeli ishte aleati i tij më i afërt në Lindjen e Mesme.

Burimet për WP thonë se në prapaskenë ka "fërkime në rritje" midis SHBA dhe Izraelit pas incidentit. Madje ato flasin për një telefonatë të tensionuar mes Biden dhe Netanyahu-t menjëherë pas vrasjes së Haniyeh.

Haniyeh, i cili ishte kryenegociatori i grupit të armatosur palestinez në bisedimet indirekte të armëpushimit me delegacionin izraelit, u vra në Teheran javën e kaluar, disa orë pasi mori pjesë në inaugurimin e presidentit të ri iranian Masoud Pezeshkian. Incidenti ka rritur më tej tensionet në rajon pasi Irani ka premtuar se do të hakmerret ndaj Izraelit.

Vrasja e Haniyeh ndodhi një ditë pasi Izraeli konfirmoi se kishte "eliminuar" komandantin e lartë të Hezbollahut Fuad Shukr në një sulm ajror në kryeqytetin libanez, Bejrut. Para kësaj, shteti hebre sulmoi portin Hodeidah të Jemenit të kontrolluar nga Houthi, duke vrarë të paktën 14 njerëz dhe duke plagosur pothuajse 100.

Megjithatë, aktualisht nuk ka shenja se Biden është i gatshëm të ushtrojë ndonjë presion të rëndësishëm mbi Izraelin për të frenuar veprimet e tij, raportoi Washington Post, duke cituar burime.

Në vend të kësaj, SHBA vendosi mjete shtesë ushtarake, duke përfshirë një skuadron avionësh F-22 dhe shkatërrues detarë, në rajon për të ndihmuar Izraelin të shmangë një hakmarrje të mundshme iraniane. Sipas Axios, Blinken u tha ministrave të jashtëm të G7 të dielën se një sulm raketor nga Teherani mund të ndodhë brenda 24 deri në 48 orëve të ardhshme.