Ish-shefi i Bankës Europiane të Investimeve, nën hetim për korrupsion  

Ish-presidenti i Bankës Europiane të Investimeve është nën hetim. Rasti i tij po shqyrtohet nga prokurorët e BE-së që hetojnë krimet e rënda financiare.

Ai është njëri prej dy “individëve të dyshuar për korrupsion dhe abuzim me ndikimin, si dhe për keqpërdorim të fondeve të BE-së”, sipas Zyrës së Prokurorit Publik Evropian (EPPO).

Emri i Werner Hoyer, i cili u tërhoq nga posti i tij si president i EIB në fund të vitit të kaluar, u konfirmua nga avokati i tij për Politico.

Oficerët e policisë nga Gjermania dhe Luksemburgu muajt e fundit kanë sekuestruar materiale në lidhje me hetimin. Në këtë kuadër është kontrolluar edhe shtëpia e Hoyer.

Hoyer, i cili drejtoi bankën midis 2012 dhe 2023, po hetohet për paratë e kompensimit të paguara një punonjësi tjetër të EIB-së që ai e kishte shkarkuar kur ishte president pas "një rekomandimi nga departamenti përgjegjës dhe Sekretari i Përgjithshëm i EIB".

Hetimi filloi pasi agjencia e BE-së kundër mashtrimit, OLAF, e raportoi rastin në EPPO, e cila ka kompetenca hetuese për të hetuar rastet ndërkufitare, për të çuar para drejtësisë shkelësit e mundshëm dhe për të kërkuar dëmshpërblim për interesat e BE-së.

EIB me qendër në Luksemburg funksionon si krahu huadhënës i BE-së dhe është instrumental në nxitjen e zhvillimit dhe integrimit në të gjithë bllokun duke ofruar kredi, garanci dhe investime në sektorin publik dhe privat.

EIB, e krijuar në vitin 1958, luajti një rol në mbështetjen e ekonomisë evropiane në vazhdën e pandemisë Covid-19 dhe mbështet politikat e BE-së në mbi 160 vende.