Dialekti i "intelektualëve" përballë faktit penal të Aleancës së Drejtorëve

Shkruan sot, apo dje(pardje ndoshta, parapardje...)Fatos Tarifa. Shkruan z. Tarifa për "Aleancat e Dështuara kundër Tiranës" dhe fjalën e ka për organizimet politike kundër Erjon Veliajt, Bashkisë. Sepse për z. Tarifa, Tirana është kryetari i Bashkisë, socialist – ky është kryefakti në të vërtetë – dhe në leximin e tij si intelektual – sepse z. Tarifa thotë shpesh që është i tillë – veprimet e ndërmarra deri më tani shkojnë kundër zhvillimit, modernizimit.

Astiri, Teatri, stadiumi, të gjitha janë vjetërsira të cilave u bëri ballë vrulli modernizues i Veliajt, të cilin sot e mbron edhe intelektuali i vetëquajtur si i tillë,Tarifa.

Ka një problem megjithatë. Bashkia e Tiranës – një pjesë e madhe e drejtimit të saj – është nën hetim penal nga Prokuroria. Dhe prokuroria nuk është një aleancë kundër Tiranës, edhe nëse këtë do të kishte qejf ta përshkruante kështu Fatos Tarifa. Bashkia është nën hetim për vjedhje rekord – merr para publike e jepja drejtorëve që kanë kompani. Kjo është akuza. Akuza o z. Tarifa, jo Kauza. Dhe akuzën duhet ta marrim seriozisht sepse ngrihet mbi “dyshime të arsyeshme” dhe prova që duhen konfirmuar. Kjo vjedhje nëse provohet a nuk përfaqëson Aleancën kryesore dhe më të rrezikshme kundër Tiranës?

Intelektuali Tarifa nuk merret me çikërrima të tilla. Sepse si vigan që është në mendim dhe analizë, sheh në horizontin e vetëm që di të shohë; atë të kundërshtarit politik të Bashkisë, të Tiranës modern siç e quan ai, një kundërshtar që mu për këto “arsye” duhet të dalë edhe si antagonist kulturor. Nuk merret me akuzën ky person sepse akuza është një yçkël që do sqarohet dhe padyshim nuk do ta cenojë modernizimin e nisur nga Zdromsi, që ka avokatë të tillë që e bëjnë Shqipërinë të duket kaq e mjerë, kaq e vobektë dhe kaq e pamundur edhe ta sodisë të vërtetën se për ta asimiluar nuk e bën dot.

Kush vallë i quan intelektualë këta? Se Veliajn e sheh për atë që është: një lëtyrë politike, një Zdroms shoqëror që u katapultua dhe përsërit ato 200 fjalë që di pa pretenduar në fakt se di të bëjë ndonjë gjë më shumë. Si mund të jetë intelektual ky farë individi që pozicionohet kështu, kur interesi publik është që së paku të marrim vesh se çfarë ka ndodhur?

Nuk mund të themi se z. Tarifa është i njëanshëm, absolutisht jo. Ai thjesht vepron brenda koinesë së vet kulturore ku aderojnë shumë të tjerë e më të cilët shqipja të bën të ndihesh i huaj. I kundërt dhe për fat i pasëmurë nga shakllabanizmi që fliste dikur një nga Veriu. I cili me siguri sot do ishte shpallur pjesë e Aleancës kundër Modernitetit siç edhe qëndroi për 45 vjet.