Tajlanda hedh idenë e Shengenit të Azisë Juglindore

Tajlanda propozon krijimin e një zone të ngjashme me Shengenin në Azinë Juglindore, për të tërhequr më shumë turistë që shpenzojnë shumë.

Siç raporton Bloomberg, kryeministri tajlandez, Srettha Thavisin, e ka konsultuar këtë ide me homologët e tij në Kamboxhia, Laos, Malajzi, Mianmar dhe Vietnam.

Ideja pas Shengenit aziatik nënkupton krijimin e një zone që i ngjan hapësirës së udhëtimit pa pasaporta të Bashkimit Evropian. Kjo do t'u mundësonte turistëve të udhëtojnë pa viza midis gjashtë vendeve fqinje, gjë që sipas kryeministrit tajlandez do të gjenerojë më shumë të ardhura për turist. Shumica e liderëve të Azisë Juglindore thuhet se e kanë mirëpritur idenë, por nuk dihet me saktësi në çfarë faze ndodhen aktualisht diskutimet.

Ideja e krijimit të një zone të ngjashme me Shengenin në rajon është duke u shqyrtuar prej vitesh. Nisma mund të rezultojë e dobishme jo vetëm për industrinë vendase të turizmit, por edhe për udhëtimet e biznesit dhe tregtinë.

Gjashtë vendet raportuan një total prej 70 milionë turistë të huaj në vitin 2023, sipas të dhënave zyrtare. Tajlanda dhe Malajzia përbënin më shumë se gjysmën e të ardhurve.

Turizmi është burim kryesor i të ardhurave për Tajlandën. Ai zë rreth 12% të ekonomisë së vendit prej afro 500 miliardë dollarësh. Numri i turistëve të huaj në Tajlandë u rrit me 20% në 2023 nga viti i mëparshëm, në më shumë se 27 milionë, më i larti që nga pandemia Covid-19. Megjithatë, Bangkoku synon ta rrisë këtë numër në 80 milionë deri në vitin 2027, për të shtuar më tej fitimet nga industria.