Qeveria e Kosovës i kthen 24 ha Manastirit të Deçanit

Një ditë pasi i Dërguari Special i SHBA për Ballkanin Perëndimor, Gabriel Escobar, akuzoi qeverinë e Kosovës për mungesë komunikimi, Prishtina zyrtare ka autorizuar kalimin e pronave të Manastirit të Deçanit, këtij të fundit.

Mbi të gjitha, kërkohej një vendim i arsyeshëm, fatkeqësisht jo i drejtë në plotninë e tij. Por me gjithë këtë për të arritur një qëllim shumë madhor që ia kemi borxh shtetit e që hap mundësi të papara më herët, ne duhet bërë hap përpara me maturi e përgjegjësi si vend i pavarur e sovran. Andaj sot i kemi thënë agjencionit kadastral të Kosovës që ta zbatojë vendimin e Kushtetueses kurse ministrja e Punëve të Jashtme, Donika Gërvalla, i ka dërguar notë verbale njoftuese Këshillit të Evropës.

Si kryeministër, nuk na pëlqen ai vendim i çuditshëm e i padrejtë, e ndërkohë ka edhe procese të tjera gjyqësore pezull për këtë çështje teksa ne si qeveri s’kemi më mjete legale e juridike për ta anuluar vendimin e Gjykatës Kushtetuese. Nuk do ta ndryshoj qëndrimin ndaj këtij vendimi të dëmshëm asnjëherë. Në anën tjetër, s’ka dyshim që anëtarësimi i Kosovës në Këshill të Evropës do të ishte jo vetëm fitore historike, por edhe hap gjigant për Republikën tonë drejt njohjes së pesëshes evropiane që mundëson anëtarësimin në NATO dhe në BE për Kosovën e pavarur

citohet kryeministri Albin Kurti.

Sipas tij vendimi lidhet pikërisht me faktin se kthimi i pronës ka qenë kusht për anëtarësimin e Kosovës në Këshillin e Europës, që do të shqyrtohet në mesin e e prillit në Asamblenë e Përgjithshme dhe në muajin maj në Këshillit të ministrave të BE-së.

Për pronën në fjalë ka një vendim të Gjykatës Kushtetuese të vitit 2016, mirëpo ekzekutimi në këtë moment i tij reflekton edhe një akt politik. Escobar e ka përshëndetur aktin, pa ngritur pretendime se “Prishtina nuk koordinohet me aleatët”, ndërkohë që duhet thënë se që pas Banjskës, Serbia dhe Kosova kanë një lloj modus vivendi që kaloi nga zëvendësimi i targave të Serbisë në Kosovë dhe heqjen e dinarit, te kthimi i pronës sot.