Japonezët “dëgjojnë” bisedat e bimëve

Një grup studiuesish nga Universiteti i Saitamas në Japoni kanë "dëgjuar" për herë të parë në kohë reale një "bisedë" mes bimëve.

Studimi, i udhëhequr nga Masatsugu Toyota dhe i botuar në revistën shkencore Nature Communication, analizoi mekanizmat e komunikimit midis ekzemplarëve të Arabidopsis thaliana, duke ekzaminuar komponimet organike të paqëndrueshme (VOCs) që bimët lëshojnë si sinjale rreziku kur ato dëmtohen ose kur ndiejnë se kërcënohen nga insektet dhe barngrënësit. Bimët ende të padëmtuara pranë rrezikut i perceptojnë këto molekula dhe aktivizojnë një përgjigje mbrojtëse për të kundërshtuar çdo atë që mund të ndodhë.

Fenomeni është studiuar që nga viti 1983 në mbi 30 lloje të ndryshme bimore, por mekanizmat që e rregullojnë atë mbetën të paqarta. Tani, për herë të parë, studiuesit japonezë kanë vëzhguar në kohë reale funksionimin e këtij shkëmbimi përmes një instrumenti që kap VOC, të cilat emetohen nga bimët e dëmtuara nga insektet, drejt ekzemplarëve të sigurt të së njëjtës specie.

Studiuesit vunë re se pas ekspozimit ndaj VOCs, si përgjigje ndaj kërcënimit të mundshëm, bimët e paprekura aty pranë gjenerojnë një proteinë fluoreshente, e cila u arrit të shihej falë një sistemi imazherie: variacionet në kalciumin ndërqelizor, përgjegjës për prodhimin e proteinave, u monitoruan duke analizuar ndryshimet në nivelin e fluoreshencës.

"Ne kemi zbuluar më në fund historinë e ndërlikuar se kur, ku dhe si u përgjigjen bimët "mesazheve paralajmëruese" që lëshojnë fqinjët e tyre të kërcënuar", tha Masatsugu Toyota.

Ky rrjet komunikimi eterik, i pakapshëm për sytë tanë, luan një rol jetik në mbrojtjen e menjëhershme të bimëve nga kërcënimet e afërta.