Finlanda nuk ofron më mbrojtje të përkohshme për ukrainasit

Finlanda nuk do të ofrojë më mbrojtje të përkohshme dhe nuk do të lëshojë leje të reja qëndrimi për shtetasit e vendeve të treta dhe personat pa shtetësi që janë larguar nga Ukraina pasi kanë banuar atje, falë një leje qëndrimi të përkohshme.

Shërbimi Finlandez i Emigracionit njoftoi se rregullorja e re ka hyrë në fuqi nga 7 shtatori dhe do të zbatohet vetëm për aplikimet që janë dorëzuar pas kësaj date, raporton Schengen Visa.

“Vendimi zbatohet për personat që mbërrijnë në Finlandë pas hyrjes në fuqi të vendimit ose që kanë mbërritur në Finlandë më herët, por nuk kanë njoftuar autoritetet për nevojën e tyre për mbrojtje të përkohshme përpara hyrjes në fuqi të vendimit,” thuhet në një njoftim të Ministrisë së Brendshme të Finlandës.

Për sa i përket lejeve të qëndrimit që Finlanda i ka lëshuar tashmë në bazë të mbrojtjes së përkohshme, Shërbimi Finlandez i Emigracionit shpjegoi se ato do të mbeten të vlefshme deri më 4 mars 2024.

Praktika e aplikimit parashikon që personat e interesuar të tregojnë një certifikatë martese, një certifikatë lindjeje, një certifikatë refugjati të lëshuar nga autoritetet ukrainase ose një leje qëndrimi të përhershme të lëshuar nga Ukraina.

Autoritetet finlandeze do të verifikojnë vërtetësinë e tyre dhe do të japin vendimin.

Ashtu si Finlanda, Holanda gjithashtu vendosi të mos ofrojë më mbrojtje të përkohshme për shtetasit e vendeve të treta që ikën nga Ukraina. Ndryshimi pritet të prekë rreth 2 900 njerëz.

bota