BE hedh zaret: Investim aseteve të ngrira ruse për të financuar Ukrainën

Komisioni Evropian pret të gjenerojë fitime prej rreth 2.6 për qind nga investimi i aktiveve që i përkasin bankës qendrore të Rusisë, të ngrira si pasojë e sanksioneve të BE-së. Shifra del në një dokument, të cilin e ka siguruar POLITICO.

BE-ja ka shqyrtuar opsionet ligjore për përdorimin e rezervave valutore ruse të ngrira në bllok, duke përfshirë investimin e tyre për të gjeneruar fitime që mund të përdoren për të ndihmuar financimin e rindërtimit të Ukrainës. Një përpjekje e tillë e paprecedentë ngre pikëpyetje ligjore, politike dhe ekonomike dhe vendet e BE-së muajin e kaluar ngritën një grup pune për të parë se çfarë mund të bëhet.

“Ekziston një konsensus midis vendeve anëtare të BE-së se është e rëndësishme të shqyrtohet me shumë, shumë kujdes, çfarë mund të bëhet sipas udhëzimeve që na janë dhënë, duke përfshirë se ajo që do të bëhet duhet të jetë në përputhje me ligjin ndërkombëtar dhe atë të BE-së”, tha Anders Ahnlid,diplomat suedez i ngarkuar me kryesimin e grupit. “Ne jemi në një situatë të jashtëzakonshme dhe ndoshta çdo zgjidhje që do të propozojmë do të jetë e një natyre që nuk ka qenë këtu më parë."

Dokumenti i Komisionit, i cili do të diskutohet nga takimi i ekspertëve kombëtarë të martën, shpjegon bazat ligjore për investimin e aseteve ruse, si dhe rreziqet që lidhen me to, dhe jep vlerësime të kthimit të mundshëm të investimeve.

Duke pasur parasysh se pushtimi i Rusisë në Ukrainë përbën një "shkelje të jashtëzakonshme dhe të rëndë" të së drejtës ndërkombëtare dhe humanitare, Komisioni beson se mund tabazojë rastin e tij për investimin e aseteve të bankës qendrore ruse dhe korrjen e kthimeve për përfitimet e Ukrainës në të drejtën ndërkombëtare.

“Kjo duket se justifikon jo vetëm masat kufizuese të paprecedenta të miratuara deri më tani, por edhe një masë po aq të jashtëzakonshme që synon kompensimin e dëmeve të shkaktuara nga ato shkelje”, thuhet në dokument, ku saktësohet se kjo do të kërkonte ndryshimin e rregullores së sanksioneve të BE-së.

Komisioni thekson gjithashtu se ndërmarrja e veprimeve të koordinuara me G7 dhe vendet e tjera do të kishte "përparësi politike dhe të tregut", duke shmangur frikësimin e investitorëve që mund të shmangnin infrastrukturën financiare evropiane nëse BE-ja vepron në mënyrë të njëanshme.

Sipas regjimit të sanksioneve të BE-së, nëse dhe kur hiqen sanksionet, pronari i aktiveve të ngrira duhet të jetë në gjendje të rikuperojë kapitalin, si dhe çdo kthim që është rënë dakord kontraktualisht përpara ngrirjes së aseteve. Por çdo kthim më i madh se ai mund të përvetësohet, beson Komisioni, dhe të përdoret për rindërtimin e Ukrainës.

“Nëse menaxhimi aktiv lejon të gjenerojë fitime përtej atyre të kontraktuara, atëherë pronarët e aktiveve të menaxhuara nuk duhet të përfitojnë nga këto përfitime pasi masa të hiqet”, shkruan Komisioni.

Përcaktimi sasior i këtyre fitimeve varet nga sa para janë investuar dhe si.

BE mendon se rreth dy të tretat e 300 miliardë dollarëve të rezervave të bankës qendrore ruse të ngrira në vendet e G7, BE dhe Australi mbahen aktualisht në bllok, duke përfshirë 191 miliardë euro në Belgjikë dhe 21 miliardë euro në një vend tjetër të BE-së, për të cilin nuk thuhet emri. “Detajet që dalin tani tentojnë të konfirmojnë [atë] vlerësimin fillestar”, thuhet në dokument.

Por ende nuk dihet plotësisht se ku mbahen rezervat e bankës qendrore ruse dhe përfshiu një detyrim për të raportuar vendndodhjen e tyre në paketën e fundit të sanksioneve kundër Rusisë, në përpjekje për të marrë një pamje më të qartë.

Investimi i këtyre miliardave në "akte likuide, me vlerësim të lartë" me maturim relativisht të shkurtër mund të gjenerojë "të ardhura domethënëse vjetore me një mesatare prej rreth 2.6 për qind", shkroi Komisioni.

Investimi në kapital do të sillte kthim më të lartë, por një klasë aktivesh më e rrezikshme mund të gjeneronte humbje deri në 4 miliardë euro në vit, duke ngritur "implikime politike dhe financiare" nëse BE-ja do të rimbursonte Rusinë për humbjet e shkaktuara gjatë investimit të aseteve të saj - ndërsa " rreziku i humbjeve në një portofol me cilësi të lartë kredie dhe afatshkurtër me yield-et aktuale duket shumë i largët.”

Megjithatë, "humbjet nuk mund të përjashtohen kurrë", dhe kështu pyetja se "kush mbart ndonjë rrezik të mbetur në rast [të] humbjeve të tilla ... do të kërkojë një përgjigje të qartë ligjore," shkruan Komisioni.