Fondet e fushatës, Le Pen gjen shpëtim te Orbani

Deklaratat e pasurisë së kandidatëve presidencialë francize, të publikuara të mërkurën, zbuluan se banka MKB i ka dhënë kandidates franceze të ekstremit të djathtë, Marine Le Pen, 10.6 milionë euro kredi, me të cilën do të financohet fushata e saj presidenciale.

MKB është pjesërisht në pronësi të miliarderit Lőrinc Mészáros, miku dhe aleati i kryeministrit Viktor Orbán, raporton Euractive, duke iu referuar mediave hungareze.

Gjatë zgjedhjeve komunale të vitit 2014, partia e Le Pen iu drejtua Bankës së Parë Çeko-Ruse të Rusisë për të financuar fushatën e saj në shumën prej 9 milionë euro. Disa vite më vonë, banka u mbyll.

Në atë kohë, lajmi ngjalli shqetësime se Le Pen, e cila tha se ishte një admiruese e Presidentit Vladimir Putin, premtoi një qasje më të butë ndaj Rusisë mbi Ukrainën, duke i kërkuar Perëndimit të heqë sanksionet ekonomike ndaj Moskës.

Shuma prej 10.6 milionë euro është një ndihmë e madhe për Le Pen, e cila ishte detyruar të bënte një fushatë me financim të vogël, për shkak të hezitimit të bankave franceze për t'i dhënë kredi.

Në Francë, fushatat zgjedhore mund të financohen nga tarifat e anëtarësimit dhe donacionet nga individë deri në një kufi prej 4600 € për donator, çka i bën kreditë një burim jetik financimi.

Pas zgjedhjeve, sistemi i rimbursimit të shpenzimeve u mundëson kandidatëve dhe partive të rikuperojnë një pjesë të parave të shpenzuara për fushatën.

Le Pen ka marrëdhënie të mira me Orban. Në tetor, ai e priti në zyrën e tij, ku diskutuan një aleancë të mundshme evropiane midis Fidesz, e cila është larguar nga Partia Popullore Evropiane, dhe Bashkimit Kombëtar që drejtohet nga Le Pen.

Në fillim të dhjetorit, ata zhvilluan bisedime në Varshavë me partinë në pushtet, Ligj dhe Drejtësi (PiS), VOX-in spanjoll dhe politikanë nacionalistë nga vende të tjera. Megjithatë, ata nuk njoftuan për krijimin e një grupi të ri në Parlamentin Evropian, siç pritej.

Banka MKB do të bëhet pjesë e bankës në zhvillim, Magyar Bankholding, në fund të marsit. Kompania Holding do të ketë një pozicion lider në treg në disa fusha dhe operon 925 degë në mbarë vendin.