Lideri i talebanëve shfaqet për herë të parë në publik

Udhëheqësi suprem i talebanëve, Haibatullah Akhundzada, iu drejtua mbështetësve në qytetin jugor të Kandaharit. Kjo është dalja e tij e parë publike qëkur mori kontrollin e grupit në vitin 2016.

Akhundzada ka qenë shefi shpirtëror i lëvizjes islamike që nga viti 2016, por ka ruajtur një profil të ulët, edhe pasi grupi i tij mori pushtetin në Afganistan në gusht. Kjo strategji ka ushqyer shpesh spekulime rreth rolit të tij në qeverinë e re të talebanëve -- madje edhe vdekja e tij është përfolur disa herë.

Të shtunën, ai vizitoi medresenë Darul Uloom Hakimah për të "folur me ushtarët dhe dishepujt e tij të guximshëm", sipas zyrtarëve talebanë, të cilëve u referohet AFP.

Nën masa të rrepta sigurie, takimi nuk u pasua me fotografi apo video, por një regjistrim audio 10-minutësh u shpërnda nga llogaritë e mediave sociale të talibanëve.

Në të, Akhundzada – të cilit i referohen si "Amirul Momineen", ose komandanti i besimtarëve -- jep një mesazh fetar.

Fjalimi i tij nuk përqendrohet në organizimin politik, por kërkon bekimin e Zotit për udhëheqjen talebane.

Ai lutet për dëshmorët talebanë, luftëtarët e plagosur dhe suksesin e zyrtarëve të Emirateve Islamike në këtë "provë të madhe".

Edhe pse besohet gjerësisht se është zgjedhur për të shërbyer më shumë si figurë shpirtërore sesa si  komandant ushtarak, deklaratat e Akhundzadas tani nxisin spekulimet se ai planifikon të marrë një rol më qendror në udhëheqjen e qeverisë së re.

Figurë unifikuese

Akhundzada u ngrit nga statusi i një figure fetare të profilit të ulët, në lider të talebanëve përmes një tranzicioni të shpejtë të pushtetit, pasi një sulm me dron amerikan në vitin 2016 i mori jetën paraardhësit të tij, Mullah Akhtar Mansour.

Pasi u emërua udhëheqës, Akhundzada siguroi mbështetjen e shefit të Al-Kaedës, Ayman al-Zawahiri, i cili e lavdëroi klerikun -- duke e cilësuar "emirin e besimtarëve".

Ky miratim nga trashëgimtari i Osama bin Ladenit ndihmoi në vulosjen e kredencialeve të tij xhihadiste me aleatët e talebanëve për një kohë të gjatë.

Akhundzada kishte për detyrë të bashkonte lëvizjen talebane të ndarë për një kohë të shkurtër gjatë luftës së ashpër për pushtet pas vrasjes së Akhtarit dhe zbulimit se udhëheqja kishte fshehur vdekjen e themeluesit të tyre Mullah Omar për vite me radhë.

Profili i tij publik ka qenë kryesisht i kufizuar në publikimin e mesazheve gjatë festave islame dhe Akhundzada besohet se e kalon pjesën më të madhe të kohës në Kandahar, qyteti kryesor i talebanëve në Afganistan.

Mesazhi i tij i fundit ishte më 7 shtator, kur ai i tha qeverisë së sapoemëruar talebane në Kabul që të respektonte ligjin e sheriatit ndërsa ata qeverisin Afganistanin.

Javën e kaluar, Mullah Yussef Wafa, guvernatori taleban i Kandaharit dhe një aleat i ngushtë i Akhundzada, i tha AFP se ishte në kontakt të rregullt me ​​shefin e tij që shfaqet rrallë.

"Ai i jep këshilla çdo udhëheqësi të Emirateve Islamike të Afganistanit dhe ne po ndjekim rregullat, këshillat e tij dhe nëse kemi një qeveri progresive në të ardhmen, kjo është për shkak të këshillave të tij", deklaroi Wafa në intervistë.