Turqia shpalos ambicien hapësinore

Presidenti turk, Rexhep Tajip Erdogan zbuloi të martën një program ambicioz 10-vjeçar hapësinor për vendin e tij që përfshin misione në Hënë, dërgimin e astronautëve turq në hapësirë ​​dhe zhvillimin e sistemeve satelitore të zbatueshme ndërkombëtarisht.

Erdogan thotë se Turqia planifikon të vendosë "një kontakt të parë me Hënën" në 2023, kur vendi shënon 100-vjetorin e themelimit të republikës turke.

Faza e parë e misionit do të kryhet përmes bashkëpunimit ndërkombëtar, ndërsa faza e dytë do të përdorë raketa turke.

Turqia ka objektiv dërgimin e qytetarëve turq në hapësirë ​​me bashkëpunim ndërkombëtar. Falë  këtij të fundit, në planet turke është edhe ndërtimi i një aeroporti hapësinor dhe krijimi i një "marke globale" në teknologjinë satelitore.

Turqia e ka themeluar Agjencinë e saj Hapësinore, ose TUA, në 2018, me synimin për t'u bashkuar me disa vende të tjera me programe hapësinore.

Kritikët e kanë vënë në dyshim vendimin e qeverisë për të shpenzuar shuma të mëdha parash në atë drejtim, në një kohë kur ekonomia e vendit nuk është në ditët e saj më të mira. Mbështetësit thonë se një program hapësinor do të sigurojë punë për studiuesit dhe mund të ndikojë në zvogëlimin e “ikjes së trurit” drejt vendeve perëndimore.

Erdogan nuk dha detaje se si Turqia planifikon të arrijë qëllimet e saj. Muajin e kaluar, ai dhe CEO i SpaceX, Elon Musk, folën me telefon dhe diskutuan bashkëpunimin mbi teknologjitë hapësinore me kompanitë turke.