Pa u mbyllur hetimet/Vdekje aksidentale", qeveria i lidh pension familjes së Klodian Rashës

Këshilli i Ministrave ka miratuar një trajtim të veçantë për familjen e 25-vjeçarit Klodian Rasha, i cili u vra nga një efektiv policie në 8 dhjetor.

Ky vendim parashikon trajtimin e familjes Rasha me një pagesë prej 61000 lekësh në muaj, shifër e cila është sa 8-fishi i pensionit social prej 7 600 lekë.

Në vendim, vdekja e 25-vjeçarit Rasha klasifikohet si aksidentale.  

Vendimi i Qeverisë është miratuar në datë 11/12/2020 dhe do të hyjë në fuqi që prej datës 1 dhjetor të këtij viti.

"Familja, e cila ka humbur aksidentalisht pjesëtarë të saj, si pasojë e veprimeve të kryera gjatë ushtrimit të detyrës nga  punonjës të organeve ligjzbatuese,  përfiton  trajtim  të  veçantë  financiar deri në masën e tetëfishit të pensionit social. Trajtimi i veçantë financiar dhe anëtari që përfiton në emër të  familjes, përcaktohet me vendim  individual të Këshillit të Ministrave dhe financohet nga buxheti i shtetit”, thuhet në vendimin e qeverisë. 

Vendimi sanksionon kështu një përkufizim përgjegjësish që mundet të rrjedhë nga mbyllja e hetimeve që ende vazhdojnë.