Senati amerikan kundër Trump: Gazetarët nuk janë armiq të popullit

Senati amerikan ka miratuar dje unanimisht një rezolutë përmes të cilës afirmon mbështetjen për një shtyp të lirë duke deklaruar se ”Shtypi nuk është armik i popullit”. Agjencia Reuters raporton se rezoluta është një përgjigje ndaj deklarimeve të presidentit amerikan Donald Trump, i cili ka akuzuar reporterët me togfjalëshin në fjalë.

Dokumenti thekson rolin e pazëvendësueshëm të shtypit të lirë për demokracinë, përçimin e normave demokratike, në informimin e elektoratit, zbulimin e të vërtetës dhe në kontrollin e pushtetit të qeverisë.

Rezoluta i bën jehonë nismës së më shumë se 350 mediave amerikane që ndërmrën një fushatë kundër presidentit Trump dhe frymës së tij kundër medias.

Ky është një akt simbolik, por që i kundërvendoset ekzekutivit amerikan në rolin që ka marrë për të kundërshtuar dhe sulme dhe akuza çdo kritikë që po i bëhet.