Kina në “Rrugën e Mëndafshit”, Shqipëria e paqartë çfarë mund të përfitojë

Në Kinë çeli punimet samiti i nismës, “Një brez një rrugë”, ku marrin pjesë udhëheqës dhe përfaqësues nga 29 vende të botës. Duke theksuar se ekonomia globale ka nevojë për nisma të reja dhe protagonistë të rinj, Presidenti kinez, Xi Jingpin  deklaroi se qeveria kineze do të vërë në dispozicion të kësaj iniciative ambicioze 124 miliardë dollarë. Sipas tij kjo nismë mund të hapë rrugët për prosperitet dhe paqe në mbarë botën.

Ji e prezantoi për herë të parë këtë projekt në vitin 2013, me objektivin për të zgjeruar lidhjet aziatike në Afrikë dhe Evropë, duke premtuar miliarda dollarë investime, kryesisht në infrastrukturë-hekurudhore, autostrada, porte, energji ...etj. "Ne duhet të ndërtojmë një platformë të hapur për bashkëpunim, për të mbështetur dhe për të zhvilluar një ekonomi të hapur globale"-tha Xi Jingpin. "Ne kemi nevojë për të krijuar së bashku një mjedis që do të lehtësojë hapjen dhe zhvillimin dhe mund të krijojmë një sistem të drejtë, të barabartë dhe transparent të rregullave për tregtinë ndërkombëtare dhe investimet."

Presidenti i Kinës tha se bankat kineze do të japin kredi me vlerë 380.000.000.000. Yuan (55 miliardë $. Dollarë) për të mbështetur bashkëpunimin ndërkombëtar në kuadër të iniciativës kineze. Disa diplomatë perëndimorë kanë shprehur shqetësim për këtë projekt, që e konsiderojnë një përpjekje për të rritur ndikimin kinez në botë. Por Pekini i ka hedhur poshtë këto pretendime duke sqaruar se nisma është e hapur për të gjithë, është reciprokisht e dobishme dhe ka për qëllim vetëm të promovojë prosperitetin.

"Ajo që ne shpresojmë është të krijojmë një harmoni të madhe globale "tha në fjalimin e tij, Xi Jingpin, duke shtuar se Pekini nuk ka ndërmend të përdorur taktika të vjetra dhe manovra gjeopolitike. "Ajo që ne shpresojmë është  të krijojmë një model të ri të bashkëpunimit reciprokisht të dobishëm.  Izolimi çon në regres. Beteja e hapjes shoqërohet me dhimbje, por kjo dhimbje krijon një jetë të re”- tha presidenti kinez,  duke iu referuar shqetësimeve në lidhje me mundësinë që presidenti i ri i SHBA, Donald Trump të zbatojë masa proteksioniste. Duke iu referuar njerëzve të tilla si Marco Polo, Xi Jingpin vuri në dukje se Rruga e Mëndafshit është pjesë e "trashëgimisë madhështore të qytetërimit botëror."

Në samit morën pjesë disa nga partnerët më të besueshëm të Kinës si presidenit i Rusisë Vladimir Putin, kryeministri i Pakistanit Nawaz Sharif, kryeministri i Kamboxhias Hun Sen, presidenti i Kazakistanit Nursultan Nazarbajev, dhe presidenti i Turqisë Retzep Tagip Erdogan. Pjesëmarrës ishin gjithashtu shumë udhëheqës evropianë, përfshirë kryeministrat e Greqisë, Spanjës Italisë dhe Hungarisë.

Shqipëria u përfaqësua nga ministri i Transporteve, Sokol Dervishaj, i cili tha  tha se marrëdhëniet mes Shqipërisë dhe Kinës, janë në një nivel shumë të mirë politik, por duhet të bëhet më shumë në forcimin e raporteve ekonomike dhe në zhvillimin e projekteve infrastrukturore.

Sipas tij, memorandumi i bashkëpunimit që u nënshkrua u hap rrugë disa projekteve. “Shqipëria është pjesë dhe përfituese e disa inisiativave, ku më e rëndësishmja është Procesi i Berlinit dhe Konektivitetit për Ballkanin Perëndimor. Lajmi i mirë është se javën e ardhshme do të nënshkruajmë marrëveshjen për instrumentat financiar për fillimin e punimeve për hekurudhën Tiranë-Rinas-Durrës, projekti i parë dhe shumë i rëndësishëm për hekurudhën shqiptare në 25 vite. Ky është një sektor që do të zhvillohet edhe më tej, për shkak të rritjes së interesit nga Bashkimi Europian dhe nga aktorë të tjerë të ndërlidhshmërisë të rajoneve të ndryshme ekonomike”-theksoi Dervishi.