Pezullohet ligji i Vetting-ut, Gjykata Kushtetuese nuk ndikohet nga presioni i ambasadës amerikane

Qeveria nuk do të marrë brenda këtij mandati frytet e reformës në drejtësi, të paktën për pastrimin e trupës së gjyqtarëve dhe prokurorëve. Përkundër objektivave të ambasadës amerikane që ligji të niste menjëherë zbatimin, ky proces duket se do të marrë shumë kohë derisa të prodhojë efektet e para.
Kjo pasi Gjykata Kushtetuese ka pezulluar ligjin e “Vetting”-ut, pas kërkesës së Partisë Demokratike, që e cilëson ligjin si antikushtetues, pasi i jep qeverisë kontrollin politik mbi organet që do të vendosin për pastërtinë e gjyqtarëve dhe prokurorëve.
Burime thanë se Gjykata Kushtetuese do të ndjekë të njëjtën rrugë që veproi me ligjin e pronave. Ajo do ta dërgojë ligjin e Vetting-ut në Komisionin e Venecias, për të vlerësuar nëse Kushtetuesja është kompetente për të shqyrtuar Vettingun, në mënyrë që të mos ketë konflikt interesi. Kërkesa e parë e PD-së në Kushtetuese ishte pezullimi i ligjit, ndërsa kërkesa tjetër është shpallja e ligjit si antikushtetues.
Pasi PD dorëzoi kërkesën në Gjykatën Kushtetuese, pati edhe një reagim nga Ambasada Amerikane, e cila paralajmëroi demokratët se po rrezikojnë të bëhen ajo parti që populli shqiptar beson se është kundër kësaj reforme dhe se po mbron gjyqtarët dhe prokurorët e korruptuar, ose gjyqtarë e prokurorë tek të cilët kanë ndikim politik.

vetingu