Blloku Bota

SHBA po e kushtëzon përdorimin e aplikacionit Tik-Tok me ndërprerjen e lidhjeve të tij me kompaninë kineze mëmë. Aplikacioni popullor shihet si rrezik për sigurinë kombëtare, përmes transmetimit të të dhënave të qytetarëve amerikanë te qeveria e Pekinit.

Një propozim dypartiak i çuar në Kongres pasi ka marrë dritën jeshile në Komitetin e Tregtisë dhe Energjisë, kërkon nga gjiganti kinez ByteDance, pronar i TikTok, t'i shesë aplikacionin popullor një entiteti amerikan, brenda afërsisht 180 ditëve nga hyrja në fuqi e projektligjit.

Dhuna në familje dhe dhuna me bazë gjinore është gjerësisht e përhapur në Azinë Qendrore. Por në mënyrë të veçantë, në Taxhikistan, një shoqëri thellësisht patriarkale, përmasat e saj janë akoma më të mëdha.

Presidenti i Turqisë, Reçep Tayyip Erdogan, ka propozuar një samit paqeje mes Rusisë dhe Ukrainës, menjëherë pas takimit të tij me homologun ukrainas, Volodymyr Zelenskiy.

Ndërkohë që ne vazhdojmë të solidarizohemi me Ukrainën, ne do të vazhdojmë punën tonë për t’i dhënë fund luftës me një paqe të drejtë mbi bazën e negociatave. Ne jemi të gatshëm të organizojmë një samit paqeje ku Rusia të jetë po ashtu e pranishme

tha Erdogan.

Franca po bën përpjekje të materializojë idenë e presidentit Emmanuel Macron për dislokimin e trupave të huaja në Ukrainë. Ministri i Jashtëm Stephane Sejourne ka qenë së fundmi në Lituani ku është takuar me homologun e vet Gabrielius Landsbergis dhe ata ukrainas, Dmytro Kuleba. Nga ky takim kreu i diplomacisë franceze ka deklaruar se Parisi i mbetet idesë, duke bërë thirrje që askush të mos kompleksohet nga kërcënimet e Rusisë.

Armenia po mendon të aplikojë për anëtarësim në Bashkimin Europian. Në një intervistë për televizionin turk, TRT, ministri i Jashtëm armen, Ararat Mirzoyan, ka theksuar se Jerevani po kërkon një afrim më të madh me Perëndimin.

Në Armeni sot po diskutohen shumë mundësi që përfshijnë edhe anëtarësimin në BE

ka thënë ai.

Komisioni Qendror i Zgjedhjeve në Kosovë ka njoftuar se zgjedhjet në katër komunat e veriut të vendit, me shumicë serbe, do të mbahen më 21 prill.

Sipas procedurës së kërkuar, nismëtarët e mbledhjes së firmave të votuesve kanë përmbushur kërkesën ligjore për 20% të numrit të votuesve në listën e zgjedhësve, çka ka çuar në miratimin prej KQZ-së të datës së zgjedhjeve të reja.

Kjo procedurë ishte propozim i qeverisë së Kosovës për të zgjidhur debatin mbi zgjedhjet në Veri që u fituan nga kandidatët shqiptarë për shkak të bojkotit të palës serbe.

Media të ndryshme raportojnë se presidenti turk, Reccep Tayyip Erdogan, ka njoftuar daljen nga skena politike.

Kjo është një finale për mua. Nën mandatin e dhënë nga ligji këto janë zgjedhjet e fundit për mua

citohet Erdogan.

Ai i është referuar zgjedhjeve lokale të 31 marsit. Ai u rizgjodh mes debateve të ashpra në maj të vitit 2023 dhe mesa duket ka vendosur ta mbyllë karrierën politike.

Debati për identitetin gjinor dominon kudo, veçanërisht në Spanjë ku me socialistët në qeveri tema ndonjëherë merr edhe konturet e absurdit.

Çështja tashmë ka rënë në vëmendjen e ushtrisë falë ligjit të ri në lidhje me të drejtat transgjinore, i prezantuar në mars 2023, i cili thjeshtoi procesin e vetidentifikimit gjinor për këdo 14 vjeç e lart, duke eliminuar nevojën për t’iu nënshtruar vlerësimeve psikologjike ose mjekësore.

Greqia po konsideron përfshirjen e femrave në shërbimin ushtarak. Ministri i Mbrojtjes, Nikos Dendias ka njoftuar aktivizimin e një ligji të posaçëm për këtë çështje.

Komisioni Europian ka hapur një corridor humanitar detar për furnizimin me ndihma të Gazës dhe Palestinës. Lajmi është bërë public nga presidentja e Komisionit, Ursula von der Leyen, që ka sqaruar se konvoji do të ketë pikënisje Qipron.

Europa po financon një përpjekje të madhe ndihme humanitare për palestinezët, 250 milionë euro vetëm këtë vit…Sfida kryesore është çuarja e kësaj ndihme te njerëzit në Gaza. Kjo është arsyeja pse ne kemi ndërmarr Koridonin Detar të Qipros, me SHBA dhe Emiratet e Bashkuara Arabe

citohet ajo.