Blloku Bota

Kriza siriane ka tensionuar marrëdhnëiet mes Perëndimit dhe Rusisë drejt një pike të re. Këshilli i Sigurimit i OKB-së është mbledhur me kërkeë të ShBA-së, Britanisë së Madhe dhe Francës për të diskutuar mbi nisjen e luftimeve në qytetin e Halepit pas sulmeve ajrore të datës 17 shtator. ShBA deklaroi se sulmi në Dayr al-Zawr që shkaktoi vdekjen e 50 ushtarëve sirianë dhe plagosjen e 100 të tjerëve ishte keqllogaritje.

Jeremy Corbyn u rikonfirmua pa vështirësi në krye të Partisë Laburiste Britanike duke vërtetuar parashikimet. Politikani i njohur si ndjekës i rrymës trockiste në të majtën britanike u detyrua të futej sërish në garë për kreun e Partisë pas referendumit të BREX-it që nxori Britaninë nga Bashkimi Europian.
Lideri i Laburistëve mori 61.8% të votave kundrejt rivalit Owen Smith. Një lloj referendumi i brendshëm për të majtn laburiste që rikonfirmoi Corbyn, pozitat e të cilit u lëkundën ndjeshëm në qershor.

Edhe pse kancelarja gjermane kohët e fundit ka pranuar se  ka bërë gabime me çështjen e emigrantëve shumica e gjermanëve beson se Angela Merkel nuk do të rifitojë besimin e tyre. Sipas një sondazhi të revistës Focus. Dhe nuk janë vetëm votuesit e partive ekstreme të krahut të djathtë si Alternativa e Popullit për Gjermaninë (AFD) që e besojnë këtë, por edhe mbështetësit e saj.

Të dhëant e 500 milionë përdoruesve të regjistruar në Yahoo janë vjedhur. Informacione personale, emra, e-maile, numra telefoni, datëlindje, fjalëkalime  si dhe pyetje e përgjigje të pakoduara u hakeruan nga hakera të cilët kompania i cilëson si “të sponsorizuar nga një shtet”. Sulmi ndodhi në vitin 2014 dhe ai po hetohet nga Byroja Federale e Hetimit në Shtetet e Bashkuara të Amerikës.

Organizata Amnesty International ka nxjerrë një raport mjaft kritik mbi situatën e refugjatëve në Greqi. Amnesty International thekson se plot një vit pas marrëveshjes së liderëve europianë, për programin e rivendosjes së refugjatëve në vende të ndryshme të Unionit, mijëra e mijëra refugjatë vazhdojnë të mbeten në Greqi, në kushte mjaft të mjerueshme.

Tre prej ushtarakëve turq që u arratisën në Greqi pas tentativës për grusht shteti, në muajin korrik, kanë marrë përgjigje negative në kërkesën e tyre për të marrë azil. Por autoritetet greke deklarojnë se refuzimi nuk do të thotë se ata do të deportohen në Turqi. Ata kanë të drejtë të apelojnë ndaj vendimit të autoriteteve, një procedurë që në Greqi zgjat me muaj.

“The Washington  Post” shkruan së fundmi për një kompolot afatgjatë të Rusisë në Ballkan. Autori Jaroslaë Wisniewski sugjeron që praktika propagandistike ruse në Ballkanin Perëndimor duhet të shërbejë si një mësim për SHBA-të, ndikimi i të cilave në këtë rajon po rrëshqet. Madje edhe në SHBA, sipas gazetës që citon burime të shërbimeve sekrete amerikane, Rusia po vepron në shkallë të gjerë për të goditur  besimin e publikut ndaj zgjedhjeve të fundit presidenciale. Por cilat janë metodat propagandistike ruse për të cilat flitet kaq shumë e që vlerësohen kaq efektive?

Salento, bregu përballë Shqipërisë nga Brindizi deri në Taranto ka njohur vitet e fundit një rritje të turizmit. Jo vetëm në numrin e turistëve, por edhe në shërbime. Investimet në infrastrukturë dhe në mjedise janë shtuar ndjeshëm dhe kjo bie në sy menjëhërë, po ta krahasosh me 10 vite më parë. Në thelb turizmi salentin bazohet në pak gjëra që ngrenë peshë: deti i pastër, ushqimi shumë i mirë, tradita e maserive dhe peizazhi i dominuar nga ullinjtë. Po kështu Salento është një zonë me pasuri arkeologjike shumë të mëdha.

Në mars të vitit 2016 disa pamje filmike përcollën kushtet dhe trajtimin e kafshëve në thertoret franceze. Çështja është hetuar nga një komision parlamentar, i cili në përfundim ka parashtruar 65 kërkesa për t’i dhënë fund kësaj sjelljeje mbi kafshët. Një nga kërkesat është instalimi i telekamerave në thertore, pasi siç vlerësohet në raportin përfundimtar, kontrolli është i pamjaftueshëm.

Ndonëse pamjet e dhëna në video u konfirmuan se i përkasin thertoreve publike, të dhëna në përdorim privatëve, në Francë ato provokuan një reagim shumë të madh.

Damasku zyrtar i ka dhënë fund angazhimit të tij për armëpushimin e sanksionuar nga marrëveshja Lavrov – Kerry e datës 9 shtator. Në një deklatë për shtyp cituar nga agjencia shtetërore “Sana”, ushtria siriane deklaron se militantët e kanë thyer marrëveshjen e armëpushimit mbi 300 herë.