Blloku Bota

Sistemi policor në Rusi do të reformohet tërësisht për të kaluar në krijimin e një Ministrie të Sigurimit të Shtetit. Ky institucion do të ngrihet mbi Shërbimin Federal të Sigurisë(FSB), çka shihet si një lëvizje që praktikisht rikthen modelin e KGB-së së dikurshme. Shërbimi sovjetik konsiderohet më i madhi në nivel organizativ dhe me ndikim të jashtëzakonshëm, aq sa kreu i tij, Yuri Andropov u bë drejtues i shtetit dhe i partisë.

Kryesuesi i Këshillit Ushtarak të NATO-s, gjenerali Petr Pavel ka deklaruar se Ballkani vazhdon të mbetet burim i mundshëm i përplasjeve ushtarake. Ai porosit që aleanca veri-atlantike duhet të ketë patjetër aftësi për kundërvënie ndaj kundërshtarëve dhe mbrojtjes së anëtarëve të saj, si dhe rol më të madh në luftën kundër terrorizmit, bën të ditur agjencia kroate e lajmeve “HINA”.

Pavel citohet të ketë thënë se situata në një pjesë të Evropës është “larg stabilitetit”, duke theksuar se “Ballkanit i kanoset terrorizmi islamik, por edhe ndikimi rus”.

Në kulmin e debatit për transportin e drogës nga Shqipëria dhe përdorimin e avionëve të vegjël për narkotrafikun, autoritetet italiane kapin në Brindisi 1 ton kanabis me prejardhje nga vendi ynë.
Gomonia me hashash, që dyshohet se ishte nisur nga Mifoli në Vlorë drejt brigjeve italiane. Në bordin e saj u gjet 1 ton hashash që po transportohej nga dy persona, për të cilët nuk bëhen të ditur identitetet.

Në 54 për qind u ndal fitorja e Rusisë së Bashkuar në zgedhjet parlamentare të së dielës. Partia e presidentit Putin rikonfirmoi mazhorancën dërrmuese në dumën ruse, duke marrë 338 nga 450 vende. Komunistët u renditën të dytët me 13.5përqind ndërsa liberalët e Zhirinovskit të tretët me 13.3 përqind.

Në Belgjikë është regjistruar këto ditë rasti i parë i eutanazisë në një minoren 17 vjeçar. Rasti është bërë publik nga gazeta falmande “Het Nieuësblad” e cila shkruan: “Në heshtje dhe në diskrecionin më absolut – për herë të parë në vendin tonë një minoren vdiq si pasojë e eutanazisë”.

Një sulm i rëndë ka ndodhur në SHBA. Një person ka therur me thikë 8 persona në një qendër tregtare në Minesota, ndërsa autori i sulmit është qëlluar për vdekje nga policia.

Armëpushimi në Siri rezultoi një teatër i nivelit më të lartë, teksa sot goditjet ajrore të koalicionit të udhëhequr nga SHBA, sollën vdekjen e të paktën 62 ushtarëve të ushtrisë së rregullt siriane. Komanda Qendrore amerikane pranoi sulmet në lindje të vendit, në Dir al-Zour por shtoi se ato mendohej se drejtoheshin ndaj pozicioneve të militantëve të Shtetit Islamik. Sipas kësaj komande, sapo është mësuar se në zonë ndodheshin ushtarë të Damaskut, sulmet janë ndalur.

Kryeministri malazez, Milo Djukanoviç, i ka dhënë një intervistë medias serbe “B92”, përmes së cilës ka adresuar disa mesazhe politike edhe për oponionin publik në Serbi. Çështja e parë e cila i interesin të gjithë rajonit është njohja e Kosovës nga Mali i Zi. Gjukanoviç sqaron se me këtë akt, askush në Malin e Zi nuk kishte për qëllim të dëmtonte Serbinë.

“DcLeaks.com”, faqja që publikoi kohë më parë materiale të fondacionit Soros, publikon së fundmi disa e-maile të Colin Powell, ish-sekretari amerikan i Shtetit. Në një prej tye, ai dërguar donatorit të Partisë Demokratike, biznesmenit, Jeffrey Leeds, Powell zbulon se Izraeli posedon 200 koka bërthamore dhe të gjitha i ka drejtuar nga Irani. Sipas Powell, Irani nuk do ta përdorë bombën atomike edhe nëse e prodhon atë sepse “në Teheran e dinë që Izraeli ka 200, të gjitha drejtuar drejt Teheranit, kurse ne kemi me mijëra”.

Bashkimi Evropian është në një pikë kritike, tha kancelarja gjermane Angela Merkel  gjatë samitit të 27 vendeve - anëtare të BE-së në Bratislavë (pa pjesëmarrjen britanike). Ky është samiti i parë ku diskutohet mbi të ardhmen e Evropës, pas Brexit. "Ne duhet të tregojmë me veprimet tona që ne të mund të bëhemi më të mirë", deklaroi  Merkel. Europa sipas saj duhet të përmirësohet në çështjet e sigurisë,  luftën kundër terrorizmit, bashkëpunimin në sektorin e mbrojtjes dhe punësimin.