Spastrim social si pjesë e zbukurimit të Parisit para lojërave olimpike

Ndezja e flakës olimpike për lojërat e radhës ka shënuar nisjen e spastrimit social në Paris. Lojërat Olimpike Paris 2024 nisin zyrtarisht më 26 korrik. Flaka olimpike u ndez më 16 prill në Greqi, kohë kur autoritetet franceze nisën dëbimin e qindra emigrantëve, të cilët të detyruar niseshin drejt pjesëve të tjera të Francës.

Ky ishte operacioni i tretë i madh i dëbimit i kryer në rajonin Île-de-France, që përfshin Parisin dhe zonat përreth, që nga fillimi i vitit 2023. Në prill 2023, rreth 400 njerëz u hoqën nga një zonë pranë fshatit Olimpik në Île. -Saint-Denis në periferi veriore të kryeqytetit. Dyqind të tjerë u dëbuan në korrik 2023 nga Thiaisi, në jug të Parisit.

Në tetor 2023, më shumë se 80 organizata jofitimprurëse që punojnë me emigrantët dhe të pastrehët themeluan grupin Le Revers de la médaille, ("Ana tjetër e Medaljes") për të denoncuar dëbimin e tyre nga rrugët e Parisit në prag të Lojërave Olimpike.

"Ka prova të ndryshme që na lejojnë të përdorim termin "spastrim social", citon France 24 Paul Alauzy, zëdhënësi i grupit dhe aktivisti për sigurinë e emigrantëve në OJQ Médecins du Monde.

Operacionet e dëbimit nuk janë të reja. Ajo që ka ndryshuar me afrimin e Lojërave është frekuenca me të cilën pastrohen vendet e pushtuara dhe dërgimi sistematik i atyre që largohen në një rajon tjetër francez.

Revers de la médaille kanë grumbulluar të dhëna për periudhën prill 2023 - maj 2024, kohë gjatë së cilës sipas raportit të tyre, autoritetet kanë vënë në shënjestër një numër grupesh: të pastrehët, emigrantët, romët, punonjësit e seksit dhe përdoruesit e drogës.

Për të krijuar një qytet kartolinash, ne i zhvendosim njerëzit dhe i bëjmë ata të padukshëm," thotë Antoine de Clerck, një aktivist nga Revers de la médaille. "Ajo që ne po shohim në terren i bën jehonë asaj që ndodhi në Olimpiadën e mëparshme jashtë vendit: ata nuk duan që njerëzit më të margjinalizuar të jenë të dukshëm për kamerat apo turistët.

Ndërkohë, autoritetet kanë mohuar çdo lidhje midis politikës së dëbimit tani në fuqi dhe Olimpiadës së ardhshme në kryeqytetin francez.

"Kjo nuk ka të bëjë fare me Lojërat Olimpike dhe Paralimpike, nuk ka asnjë spastrim social," tha në mars ministrja franceze e Sporteve, Amélie Oudéa-Castéra.

Kjo politikë akomodimi emergjent synon të shpërndajë barrën në të gjithë vendin... Operacione të këtij lloji kryhen rregullisht, nuk janë diktuar nga Olimpiada.

Raportuesi i Posaçëm i OKB-së për të Drejtën e Strehimit, Balakrishnan Rajagopal, ndërkohë, i bëri thirrje Francës në prill që të trajtojë gjendjen e "grupeve të margjinalizuara".

"Dëbimet për të zbukuruar Parisin përpara [olimpiadave] janë të ngjashme me atë që Kina, India apo shumë të tjerë kanë bërë përpara eventeve të këtyre përmasave. Si e justifikon Franca këtë?" ai pyeti në X.