Përhapja e sëmundjeve infektive ushqen regjimet autoritare

Sipas psikologëve, përveç sistemit tonë fiziologjik imunitar kemi edhe atë të sjelljes: një kod sjelljeje të pavetëdijshëm që na ndihmon të qëndrojmë pa sëmundje, përfshirë frikën dhe shmangien e njerëzve të panjohur – rrjedhimisht ndoshta edhe të infektuar. Kur rreziku i infeksionit është i lartë, kjo sjellje e "stresit parazitar" rritet, duke u shfaqur potencialisht si qëndrime dhe madje edhe modele votimi që mbështesin konformitetin dhe refuzojnë "grupet e huaja" - një tipar thelbësor i politikës autoritare. Një studim i ri, më i madhi që ka marrë në shqyrtim lidhjet midis përhapjes së patogjenit dhe ideologjisë, zbulon një lidhje të fortë midis niveleve të infeksionit dhe shtameve të autoritarizmit në qëndrimet publike, udhëheqjen politike dhe madje edhe ligjvënien. Ndërsa të dhënat e përdorura për studimin i paraprinin COVID-19, psikologët e Universitetit të Kembrixhit thonë se dëshira më e madhe e publikut për "konformitet dhe bindje" si rezultat i pandemisë mund të bëjë që politikat liberale të mos përkrahen në kutitë e votimit. Gjetjet janë botuar në “Journal of Social and Political Psychology”.

Studimi u krye duke marrë në shqyrtim të dhënat e shteteve të SHBA dhe më pas edhe të 47 vendeve të tjera.

Shtetet më autoritare të SHBA kishin përqindje të sëmundjeve infektive - nga HIV te fruthi - rreth katër herë më të larta se shtetet më pak autoritare, ndërsa për vendet më autoritare kjo ishte trefish më e lartë se shifra më e ulët në SHBA.

Kjo ndodhi pasi shkencëtarët llogaritën një sërë faktorësh të tjerë socio -ekonomikë që ndikojnë në ideologji, përfshirë besimet fetare dhe pabarazitë në pasuri dhe arsim. Ata gjithashtu zbuluan se nivelet më të larta të infeksionit rajonal në SHBA korrespondonin me më shumë vota për Donald Trump në zgjedhjet presidenciale të SHBA në 2016.

Për më tepër, si në rastin e vendeve të ndryshme të botës, edhe në shtetet amerikane, nivelet më të larta të sëmundjeve infektive lidheshin me ligje më "vertikale" - ato që prekin në mënyrë disproporcionale grupe të caktuara, të tilla si kontrolli i abortit ose dënimet ekstreme për krime të caktuara. Ky nuk ishte rasti me ligjet "horizontale" që prekin të gjithë në mënyrë të barabartë.

"Ne gjejmë një lidhje të qëndrueshme midis përhapjes së sëmundjeve infektive dhe një preferencë psikologjike për konformitetin dhe strukturat hierarkike të fuqisë - shtyllat e politikës autoritare," tha autori kryesor i studimit dr. Leor Zmigrod, ekspert në psikologjinë e ideologjisë nga Universiteti i Kembrixhit.

"Ne zbuluam se normat e patogjenëve nga mbi njëzet vjet më parë ishin akoma të rëndësishme për qëndrimet politike deri në vitin 2016. Nëse COVID-19 rrit joshjen e politikës autoritare, efektet mund të jenë afatgjata", thotë ai.

Gjetjet janë një shenjë paralajmëruese se sjelljet që shmangin sëmundjet kanë implikime të thella për politikën.

 "COVID-19 mund të formësojë tendencat e njerëzve drejt konformitetit dhe bindjes, dhe kjo mund të shndërrohet në preferenca autoritare politike, modele votimi dhe ligje. Shëndeti dhe politika mund të jenë më të ndërthurura nga sa e kishim parashikuar më parë", konkludon Zmigrod.