Kodheli pranon cënimin e sigurisë kombëtare: “Nuk e di nëse kufiri duhet të ishte lënë gjithë këto vite me roje private”

Ministrja e Mbrojtjes, Mimi Kodheli ka komentuar  grabitjen me armë në aeroportin e Rinasit dhe akuzat për cënim të sigurisë kombëtare. Indirekt ajo pranoi se hyrja në pistën e aeroportit përbën shkelje të inegritetit territorial dhe se Prokuroria duhet të nxjerrë në pah përgjegjësit për atë që ka ndodhur. “Sot çështja ka kaluar në dorë të Prokurorisë dhe është ajo që do të nxjerrë në pah përgjegjësitë dhe mangësitë e kësaj që ka ndodhur. Personalisht e konsideroj rrethimin e aeroportit një pikë kufitare dhe nuk e di nëse duhet të ishte lënë në vite me roje private. Ju siguroj që aeroporti Qemal Atataturk konsiderohej një nga 5 aeroportet më të sigurta në botë dhe ndodhi ajo që ka ndodhur por kjo nuk do të thotë se ne nuk duhet të shohim ku i kemi mangësitë. Mbrojtja kolektive do na hiqte këtë dhimbje koke, por ne duhet të bëjmë detyrat tona të shtëpisë. Duhet të ngrihet sensibiliteti për sigurinë e qytetarëve tanë. Ngjarjet e fundit treguan se anjë vend nuk është i sigurtë”-deklaroi Kodheli.