Sezoni i tretë i serialit “The Mentalist” kalon nga Italia 1 në Rete 4

Telespektatorët shqiptarë dhe ata italianë të apasionuar pas personazhit të Patrick Jane (interpretuar nga Simon Baker), mund të ndjekin vazhdimin e serialit thriller policor “The Mentalist” (Mentalisti – Lexuesi i mendjes) tani në Rete 4. Prej ditësh po transmetohet në këtë kanal njoftimi e kalimit të sezonit të tretë të serialit interesant nga Italia 1 në Rete 4. “The Mentalist” ka një shikueshmeri të lartë në Shtetet e Bashkuara (sezoni 3 pati një mesatare prej 15 milionë shikuesish) dhe sezoni i katërt nis më 22 Shtator 2011 në CBS. Ka zëra që thonë se tashmë kontrata është nënshkruar deri për sezonin 7 të serialit. Interpretimi fantastik i aktorit sharmant Simon Baker vazhdon të tërheqë shikues nga e gjithë bota dhe e ka ngritur atë në majë të famës mbarëbotërore.

Seriali u krijua nga Bruno Heller i cili është dhe producenti dhe ka për regjizorë Chris Long dhe David Nutter. Ai nisi transmetimin në CBS më 23 shtator 2008 dhe u prit jashtëzakonisht mirë nga teleshikuesit.

Personazhi kryesor është Patrick Jane (Simon Baker), një këshilltar i pavarur me aftësi të zhvilluara psiqike i punësuar në Zyrën Hetimore të Kalifornisë (CBI) në Sacramento, California. Ai u bashkua me këtë institucion pasi gruaja e tij Angela dhe vajza e Charlotte u vranë nga një serial killer i quajtur Red John. Ai është i bindur se duke qënë në brendësi të forcave të zbatimit të ligjit dhe duke  ndihmuar ata në zbardhjen e krimeve do të vihet në gjurmë të vrasësit të familjes së tij dhe do ta sjellë atë para drejtësisë. Me aftëstë e tij psiqike ai ka ndihmuar në zbardhjen e shumë vrasjeve misterioze dhe në burgosjen e shumë kriminelëve, por misionin e tij kryesor në jetë nuk ka arritur ta realizojë akoma. Të presim çfarë do të sjellin seritë e këtij sezoni. Për ata që nuk e kanë ndjekur serialin deri tani do t’iu rekomandoja të fillonin ta bënin këtë në këtë sezon, duke  garantuar se do të argëtohen pa masë me lojën fantastike të Simon Baker.

A.Kola