Ilir Meta s’po synon rolin e “Gjinos”…

Ilir Meta u bë kryeministër i Shqipërisë fill pasi kishte kapur moshën 30 vjeç. Ai zëvendësoi në atë post një 30 vjeçar tjetër, Pandeli Majkon, i cili, për një vit, kishte mbushur në kryeministri boshllëkun e krijuar nga zbythja e përkohshme e Fatos Nanos nga jeta politike. Përdora fjalën “u bë” dhe jo “u zgjodh” për Metën sepse, në fakt, atë e bëri kryeministër Nanua, i cili, pasi u rizgjodh kryetar i PS-së me një epërsi të vogël votash ndaj Majkos, përkrahu kandidaturën e 30-vjeçarit tjetër për kryeministër, në mënyrë që mos të shkaktohej një çarje e pariparueshme e partisë.

Por shumë shpejt, “regjenti” Nano u bë pishman për pushtetin që i kishte dhënë “princit” Meta, sepse ky i fundit, duke përdorur atë pushtet, arriti të siguronte përkrahjen e 70% të KPD-së socialiste. Dhe nëpërmjet lëvizjes famëkeqe “Katarsis”, Nanua e rrëzoi nga froni “princin” Meta, dhe vuri përsëri përkohësisht në të “ish-princin” Majko. Me fjalë të tjera, iku një “Gjino” e rierdhi “Gjinoja” paraardhës… (Shënim: Emri i personazhit Gjino në komedinë “14 vjeç dhëndër” të Çajupit përdorej në shtypin e kohës si eufemizëm për të rinjtë që iknin e vinin në postin e kryeministrit)

Një skenar të ri me rol “Gjinoje” për Metën parashikonte para ca kohësh Sokol Balla në revistën JAVA (http://www.respublica.al/artikuj/2012/11/04/nese-ps-dhe-koal... ). Sipas Ballës, Ilir Meta është i prirur drejt një koalicioni me PD-në sepse:

1 - Meta mendon se e bën mirë punën e kryeministrit; ai është i prirur për të qenë numri një. Dhe këtë mund t’ia japë vetëm Berisha, i cili, nëse fiton mandatin e 3-të, mund të mos joshet më nga posti i kryeministrit, pasi do të dojë ta mbyllë karrierën në Presidencë.
2 - Rama është në garë për kryeministër, dhe këtë post s’mund t’ia japë Ilir Metës.
3 - Meta e sheh Ramën si një vartës të dikurshëm dhe e ka psikologjikisht të pamundur të bëhet nesër vartës i tij.

Në këtë skenar të Ballës, është i trupëzuar presupozimi se Meta është i preokupuar kryesisht për rolin që do të luajë në skenën politike shqiptare në moshën 45 vjeç dhe jo kur të jetë 55 vjeç. Në qoftë se e para është e vërtetë, skenari i Ballës edhe mund të materializohet – Berisha mund t’ia dhurojë Metës rolin e “Gjinos” pas dy vjetësh… (Presidenti Nishani mund të japë dorëheqjen për arsye shëndetsore dhe vendin e tij ta zërë Berisha).

Parë nga ky këndvështrim, qarkullimi i idesë së një koalicioni paselektoral LSI-PD mund të ketë bukë. Por problemi është se “Gjinoja”, Gjino mbetet. Një kryeministër që rri në post falë votave të një mazhorance që nuk e kontrollon, nuk mund të ketë jetëgjatësi në të. Siç theksova në fillim të këtyre rreshtave, Majkua dhe vetë Meta e kanë provuar këtë skenar në të shkuarën. “Plaku Mere” i mazhoranës së atëhershme parlamentare i shkarkoi që të dy kur ia deshën llogaritë e veta… (Shënim: Plaku Mere është personazhi i romanit/filmit “Njeriu me Top”, i cili kishte një autoritet të padiskutueshëm në familjen e tij)

Por a ka shans Ilir Meta të arrijë një ditë të jetë në rolin e një “Plaku Mere”? Në skenarin e Ballës, një farë shpresëze hipotetike që Ilir Meta të bëhet udhëheqësi i një mazhorance parlamentare në të ardhmen do të krijohej nga një rikthim i tij eventual në rolin e udhëheqësit të së majtës. Dhe problemi është se këtë s’mund ta bëjë pasi t’i ketë shërbyer Berishës si mëkëmbës në qeveri për 4 vitet e ardhshme -- atëherë mund të jetë shumë, shumë vonë për të.

Kjo sepse, së pari, në qoftë se Meta e ndihmon Berishën të marrë një mandat të tretë pas 23 qershorit, Partia Socialiste mund të ndahet në disa copa. Ose, më keq akoma për Metën, ajo mund të mos e pranojë atë as ti afrohet selisë, pas ndihmës së florinjtë që mund t’i japë Berishës…

Një skenar i ndryshëm nga i Ballës është:

1- Krijim i qeverisë së majtë me kryeministër nga partia e parë e koalicionit të majtë (Rama dhe elektorati i tij do të gëlltisnin çdo mëkat të shkuar të Metës, vetëm për të rrëzuar “gogolin” Berisha);
2- Në një periudhë disa-vjeçare, kur Edi Rama të tërhiqet ose të dalë nga skena politike, Meta mund të shpresojë të bëhet “Plaku Mere” i mazhorancës së majtë.