Për kë votojnë ish-të përndjekurit?

Sot, në ditën kur në bulevardin “Dëshmorët e Kombit” pati dy marshime rivale – një i ish të përndjekurve nga regjimi i Enver Hoxhës dhe një i përkrahësve nostalgjikë të këtij të fundit – vlen t’i jepet përgjigje pyetjes “Për kë votojnë ish të përndjekurit?”.

Nga një sondazh kombëtar që zhvillova ditët e fundit, më rezulton se në qershor 2013, 55% e zgjedhësve nga familje ish të perndjekura kanë votuar për partitë e djathta (PD, FRD, LZHK, PR, PDIU etj.), 15% nuk kanë marrë fare pjesë në zgjedhje, dhe 30% kanë votuar për partitë e majta (PS, LSI, PBDNJ, etj.).

Tek kampi i djathë, shtresa e ish të përndjekurve ka kontribuar gjysmën e votave të të gjithë partive që e përbëjnë atë kamp, ndërsa në kampin e majtë vetëm 15%.

Nga 1200 të anketuarit, 30% deklaruan se familja e tyre ka qenë e përndjekur politikisht para vitit 1991. Përkufizimi i familjeve të përndjekura përfshin ato që kanë patur të afërm të pushkatuar, burgosur, internuar, arratisur, dëbuar, përjashtuar nga partia, transferuar në provinca të largëta për arsye politike/biografike etj.