Presheva mban “peng” vizitën e Ramës. Daçiç: Po e diskutojmë

Mes Serbisë dhe Shqipërisë ka ende mos marrëveshje sa i përket vizitës së kryeministrit Edi Rama në Beograd. Ministri i Jashtëm serb, Ivica Daçiç në një konferencë për shtyp ka thënë ende nuk është kopsitur vizita e shefit të qeverisë shqiptare pasi mes dy vendeve ka mosmarrëveshje sa i përket axhendës.

“Programi i vizitës ende nuk është përcaktuar, dhe ka propozime nga anën shqiptare që ende nuk janë pranuar. Ka bisedime mes Kabineteve të kryeministrave, të ndihmuar nga Ministria serbe e Punëve të Jashtme”, deklaroi shefi i diplomacisë serbe. Sipas mediave një nga pikat e diskutimeve është vizita në Preshevë.

Daçiç theksoi se vizita kryeministrit Rama në Serbi në 10 nëntor do të kontribuojë në forcimin e marrëdhënieve të fqinjësisë së mirë midis dy vendeve, pavarësisht çështjes së fundit, ndeshja Serbi-Shqipëri.

"Për ne ishte e lehtë të anullonim vizitën e Ramës, por qëllimi i kësaj qeverie është për të zgjidhur çështjen", tha Daçiç.