Kompania ACR është e preferuara e Rulit?

I njëjti shkrim pa emër, por me tituj të ndryshëm, është publikuar sot nga Shekulli e Tema. Titujt duket se janë më eksklamativë, se sa duhet, gjë që mund të bëjë me pa të drejtë të paragjykohet përmbajtja e shkrimit. Titulli i Shekullit është “Genc Ruli, një tjetër ministër që duhet arrestuar?”, ndërsa titulli i Temës është edhe deskriptiv, edhe akuzues: “Genc Ruli, ministri që u fali miliona dollarë miqve të ACR-së, dhe po lë jetimë fëmijët e minatorëve”. Në versionin e zgjeruar të Temës nënvizohet, se “ish Ministri i Ekonomisë dhe Energjetikës, Genc Ruli, është përgjegjës direkt për situatën e sotme në Minierën e Bulqizës, pasi në verën e vitit 2009 ka shkelur Kushtetutën e Shqipërisë dhe legjislacionin shqiptar. Në 9 korrik të atij viti, dy ditë pasi kishte marrë një kërkesë zyrtare nga kompania ACR, ish ministri i Energjetikës Genc Ruli ka firmosur ndryshimin e marrëveshjes koncesionare të kromit, duke falur kompaninë për mosrealizimin e investimeve, por edhe penalitetet që duhet të paguante. Marrëveshja nuk u kalua në Kuvend dhe madje as në qeveri. [Konkretisht] në datën 7 korrik të vitit 2009, kompania “ACR” i drejtohet zyrtarisht ministrisë duke kërkuar shtyrjen e afatit të investimeve. Vetëm dy ditë më vonë ish-ministri Ruli firmos marrëveshjen duke shtyrë mbi 13 milionë euro investime për vitet 2009-2013, edhe pse sipas marrëveshjes investimet duhet të ishin kryer sakaq.”

Është e vërtetë e gjithë kjo? S’do ish keq të kishim një përgjigje nga ministri Ruli në këtë mes.

E.G.