Britanikët janë duke pyetur veten: pse e gjithë kjo?

Gazeta New York Times kish sot një shkrim me titull “Britanikët  nuk e dinë ende ‘pse-në’ e asaj që ndodhi”. Në fakt, shumë vetë kanë mbetur të topitur nga kronika të çuditshme, që flasin, fjala vjen, për Natasha Reid-in, 24 vjeç, një veprimtare sociale, e cila iu bashkua tollovisë, u fut në një dyqan paisjesh elektronike, e vodhi një televizor që kushtonte 500 stërlina, për Nicolas Robinson-in, një student inxhinierie, që vodhi disa shishe uji (‘e bëri se kish etje”, thotë avokati i tij kot më kot), apo për një djalë 11 vjeçar që vodhi një kosh plehrash. Nëna e këtij të fundit, duke pritur tek dera e gjykatës, nuk dinte të bënte gjë tjetër, veçse të kthehej herë pas here nga i biri, e t’i thosh: Why?

Këtë pyetje janë duke bërë të gjithë: Pse? Për kryeministrin Cameron, përgjigja është e thjeshtë: është fjala për horra trushkulur. Për laburistët në opozitë, përgjigja është gjithashtu e thjeshtë (sa shkurt i presin drutë politikanët, e në këtë pikëpamje janë më keq se sa ata plaçkitësit  e rrugëve në Londër e në Manchester): është mosbesimi i banorëve të zonave të varfëra tek policia, dhe vetë pabarazia sociale e ekonomike. Disa politikanë të tjerë e kanë gjetur shkakun: teknologjia, e cila bën të mundur përhapjen e mesazheve në një kohë rekord. Disa komentatorë bëjnë me faj modernitetin, e më konkretisht “kulturën e tahmasë e të pandëshkueshmërisë”, që shtrihet deri në zyrat e larta të shtetit e të korporatave,  Etj, etj.

Siç shihet, ka shumë përgjigje, por asnjëra syresh nuk ta mbush mendjen pse “djem e vajza të arsimuara, të edukura me respektin për ligjin e për forcat e rendit, pa probleme mbijetese, e në disa raste të rritur mes kamjes” iu dorëzuan ngasjes budallaqe për të vjedhur atë që e kanë e për t’iu kundërvënë atyre që janë në mbrojtje të tyre. Ndoshta përgjigja që e lidhte të gjithë këtë me do patologjira të modernitetit i afrohet pak më shumë se të tjerat së vërtetës. Ndoshta.

E.G.